Oraza ait - qonaqjailyq pen meiirbandyqtyń, dostyq pen tatýlyqtyń merekesi. Bul týraly qazaqstandyqtardy ait merekesimen quttyqtaǵan QR Musylmandary dini basqarmasynyń tóraǵasy Serikbai qajy Oraz aitty, dep habarlaidy QazAqparat.
«Qadirmendi qaýym! Barshańyzdy musylman úmbetiniń ulyq meiramy - Oraza aitpen shyn júrekten quttyqtaimyn. Qasietti juma kúnimen qatar kelgen ait meiramy qutty-berekeli bolǵai! Bizdiń halqymyz ramazan aiyn ejelden erekshe qasterlep: «On eki aidyń sultany», - dep qadirlegen. Al mereke kúnderi aǵaiyn-jurt bir-birine «ait qabyl bolsyn» aityp, jyly lebizderi men izgi tilekterin arnaǵan. Aǵaiyn-týysqa aittap barý, balalar men qadirli qonaqtarǵa aittyq berý - san ǵasyrdan beri jalǵasyp kele jatqan igi dástúr», - dedi Bas múfti quttyqtaýynda.
Serikbai Orazdyń aitýynsha, Oraza ait - qonaqjailyq pen meiirbandyqtyń, dostyq pen tatýlyqtyń merekesi. Izettilik pen izgilikke, birlik pen igilikke úndeitin bul meiram elimizde turatyn túrli ulttar men ulystardy da yntymaqqa uiystyra túsedi.
«Ait» - «merekeleý», «hal surasý», «bir-birin qýantý», «qýanyshqa toptalý» degen sóz. Demek, bul kúnderi otbasyn, aǵaiyn-týys, kórshiler men kómekke muqtaj jandardy qýanyshqa bólep, alǵysyn alýdyń - saýaby úlken. Jabyqqan jannyń kóńilin jadyratyp, shańyraqty shat-shadyman kúige bólep, syilyq úlestirý de - merekeniń sánin keltire túsetin izgi amaldyń biri.
Ulyq meiramda tolyq jýynyp, jupar iis sebinip, jamaǵatpen ait namazyna qatysýdyń saýaby erekshe. Ait namazyna barýdan buryn qurmadan dám tatý - paiǵambarymyz Muhammedtiń (oǵan Allanyń salaýaty men sálemi bolsyn) súnnet amaly.
«Oraza ait - bir ai boiy tózimdilik tanytyp aýyz bekitken, yqylaspen qaiyrymdylyq jasaǵan pendeniń qurmet pen marapatqa, qýanysh pen saýapqa keneletin sát (...) Musylman qaýymynyń osynaý shýaqty meiramynda árbir shańyraqqa baiandy baqyt, Allanyń amandyǵy men bereketin tileimin», - dedi Bas múfti.
Eske salaiyq, biyl 17 mamyrda bastalǵan Oraza aiy 14 maýsymda aiaqtaldy. Qadyr túni maýsymnyń 11-inen 12-sine qaraǵan túni atap ótildi.
Búgin, 15 maýsymda (juma) Oraza ait meiramynyń alǵashqy kúni bastaldy.
