نەسيە تاريحى كوللەكتورلارعا ٶتكەن تۇرعىنداردىڭ بورىشىن كەشٸرۋ مەسەلەسٸ ەكٸ سانات بويىنشا قارالادى. بۇل تۋرالى قر ۇلتتىق بانك تٶراعاسىنىڭ ورىنباسارى ولەگ سمولياكوۆ ورتالىق كوممۋنيكاتسييالار قىزمەتٸندە ٶتكەن باسپاسٶز كونفەرەنتسيياسىن ايتتى.
«نەسيەسٸ كوللەكتورلارعا ٶتٸپ كەتكەن ازاماتتاردىڭ مەسەلەسٸ ەكٸ سانات بويىنشا قارالادى. بٸرٸنشٸسٸ بويىنشا, نەسيە بانك بالانسىنان شىعارىلمايدى. كوللەكتور قارىز الۋشى مەن بانك اراسىندا بايلانىس ورناتىپ, قارىزدىڭ قايتۋىنا ىقپال ەتەدٸ. ونداي نەسيەلەر بانك بالانسىنا ساقتالاتىندىقتان, بورىشىن كەشٸرۋ اكتسيياسىنا قاتىسا الادى. ال نەسيە بانك بالانسىنان شىعارىلىپ, كوللەكتورعا ساتىلعان بولسا, ونداي نەسيە يەلەرٸ كەشٸرٸمنەن تىس قالادى. كوللەكتورلىق تۋرالى زاڭنامادا بانك قارىز يەسٸنٸڭ كەلٸسٸمٸ بولعان جاعدايدا عانا ونى كوللەكتورعا ٶتكٸزە الادى. كوللەكتورعا ٶتٸپ كەتكەن بورىش يەسٸنە بانك بۇدان كەيٸن شاعىمدانا المايدى. قازٸر ٸسٸ كوللەكتوردىڭ قولىندا جاتقان قانشا بورىشكەر بار ەكەنٸن ايتا المايمىن. ونداي نەسيەلەردٸڭ جالپى سوماسى بٸرنەشە ونداعان ملرد تەڭگەدەن اسادى», - دەدٸ ولەگ سمولياكوۆ.
ەسكە سالساق, قر پرەزيدەنتٸ قاسىم-جومارت توقاەۆ قازاقستاندىقتاردىڭ بورىش جٷكتەمەسٸن جەڭٸلدەتۋ تۋرالى جارلىققا قول قويعان بولاتىن.
بٷگٸنگە دەيٸن بورىش جٷكتەمەسٸن جەڭٸلدەتۋ بويىنشا 507 مىڭ قازاقستاندىق انىقتالعان.
