قازاقستاننىڭ تۇڭعىش پرەزيدەنتٸ نۇرسۇلتان نازارباەۆ قازاقستاندىقتاردى قۇربان ايت مەرەكەسٸمەن قۇتتىقتادى, - دەپ حابارلايدى elbasy.kz.
"قۇرمەتتٸ وتانداستار! بارشاڭىزدى قاسيەتتٸ قۇربان ايت مەيرامىمەن شىن جٷرەكتەن قۇتتىقتايمىن! قۇربان ايت - ادامداردى بەيبٸتشٸلٸك پەن بٸرلٸككە, مەيٸرٸمدٸلٸك پەن ٸزگٸلٸككە ٷندەيتٸن جارقىن مەرەكە. قازاقستاندىقتار ٷشٸن بۇل مەيرامنىڭ ماڭىزى ەرەكشە. ول ادامگەرشٸلٸك جەنە رۋحاني قۇندىلىقتاردى ناسيحاتتاپ, تٷرلٸ ۇلت پەن دٸن ٶكٸلدەرٸ اراسىنداعى اۋىزبٸرلٸك پەن سىيلاستىقتى ارتتىرۋعا سەپتٸگٸن تيگٸزەدٸ.
ايت كٷندەرٸ ەربٸر ادام يگٸ ٸستەر جاساپ, رۋحاني تازارۋعا, قۇربان شالىپ, كٶمەككە مۇقتاج جاندارعا قول ۇشىن سوزۋعا تىرىسادى. قازٸرگٸ ۋاقىتتا قۇربان ايت مەيرامى جاقسىلىقتىڭ جارشىسىنا اينالىپ, ەلٸمٸزدە تاتۋلىق پەن كەلٸسٸمدٸ نىعايتۋعا ۇيتقى بولىپ وتىر. الداعى ۋاقىتتا دا سولاي بولارىنا كەمٸل سەنەمٸن. وسىناۋ قاستەرلٸ مەرەكەدە ەربٸر شاڭىراققا شاتتىق, تىنىشتىق پەن باق-بەرەكە تٸلەيمٸن! ايت قابىل بولسىن!" - دەدٸ نازارباەۆ.
