قازاقستان پرەزيدەنتٸ بٸشكەكتە جوعارى ەۋرازييالىق ەكونوميكالىق كەڭەستٸڭ كەڭەيتٸلگەن وتىرىسىندا بايانداما جاسادى, دەپ حابارلادى قازاقپارات اگەنتتٸگٸ.
نۇرسۇلتان نازارباەۆ مامىردا استانادا ەۋرازييالىق ەكونوميكالىق وداق قۇرۋ تۋرالى شارتقا قول قويعان سەتكە ٷش جىل تولاتىنىن اتاپ ٶتتٸ. مەملەكەت باسشىسى كەمشٸلٸكتەر مەن قاۋٸپكە قاراماستان, ۇيىمنىڭ ٶمٸر سٷرۋگە قۇقى بار, ال مٷشە مەملەكەتتەر ەكونوميكالىق ٶسٸم كٶرسەتٸپ كەلەدٸ.
قر پرەزيدەنتٸنٸڭ ايتۋىنشا, باستاپقى كٷردەلٸ كەزەڭدە كٶپ جۇمىستار جاسالدى. شارتتىق قۇقىقتىق بازا قۇرىلىپ, تۇراقتى كەڭۋ ٷستٸندە. ۇزاقمەرزٸمدٸ, ورتامەرزٸمدٸ باسىمدىقتار ايقىندالدى. پراكتيكادا تاۋارلار, قىزمەتتەر, كاپيتال, جۇمىس كٷشٸ ەركٸن قوزعالا باستادى. تٷرلٸ ەلدەرمەن, حالىقارالىق ۇيىمدارمەن بايلانىس رەتتەلە تٷسۋدە.
«ەاەو-نىڭ قالىپتاسۋ كەزەڭٸ بارلىق ەلدەردٸڭ داعدارىس قۇبىلىستارىن ەڭسەرۋٸ تيٸس قيىن كەزەڭگە دٶپ كەلدٸ. مۇنىڭ بارلىعى سوڭعى ۋاقىتتاردا ەلەۋلٸ تٶمەندەپ, قاۋٸپ تۋدىرعان ۇيىمنىڭ كٶرسەتكٸشتەرٸنەن بايقالدى. بۇل اقتالمادى. داعدارىس مەڭگٸلٸك ەمەس. تٶمەندەۋ بار جەردە ٶسۋ دە بار. ٶتكەن جىلى بٸزدٸڭ ەلدەردٸڭ باسىم بٶلٸگٸ ەكونوميكالىق ٶسٸم كٶرسەتتٸ. ونىڭ ٸشٸندە قازاقستان دا بار. 2017 جىلدىڭ باسىنداعى ستاتيستيكا دەرەكتەرٸ بٸزدە ەرەكشە وپتيميزم وياتا تٷسۋٸ قاجەت», - دەدٸ ن. نازارباەۆ.
ەكٸ اي قورىتىندىسى بويىنشا ەاەو سىرتقى ساۋدا كٶلەمٸ 37%-عا, ٶزارا ساۋدا 38%-عا ارتتى.
«مىسالى, قازاقستاننىڭ ەاەو-مەن ساۋداسى 56,5%-عا, رەسەيمەن - 50%-عا, بەلارۋسپەن - 50%-عا, قىرعىزستانمەن - 41%-عا, ارمەنييامەن - 3,5 ەسەگە ارتتى. ياعني, كەمشٸلٸك كەمشٸلٸگٸمەن, ال بٸز ودان ەرٸ جۇمىس ٸستەۋٸمٸز قاجەت ەكەنٸن كٶرسەتٸپ جاتىرمىز», - دەدٸ قر پرەزيدەنتٸ.
رەسەي پرەزيدەنتٸ ۆلاديمير پۋتين ەاەو-نىڭ جۇمىس ٸستەۋٸن مٷشە مەملەكەتتەر ٷشٸن «قاۋٸپسٸزدٸك جاستىعىنا» بالادى.
«بەلگٸلٸ بٸر دەرەجەدە ول (وداق) سىرتقى كونيۋنكتۋرانىڭ ىقپالىن جويىپ, ۇلتتىق ەكونوميكانى جاڭا باعىتتارعا بەيٸمدەلدٸ», - دەدٸ رف باسشىسى. ۆ. پۋتيننٸڭ ايتۋىنشا, كٶپ جاعدايدا وداق نارىعىنىڭ ارقاسىندا قازاقستاندا جاڭا اۆتوموبيل جاساۋ سالاسى دامۋدا.
