پروديۋسەر گٷلزيرا ايداربەكوۆا ەلەۋمەتتٸك جەلٸدە ەيەلدەردٸڭ كٷيەۋٸنەن رۇقسات سۇراۋىنا قاتىستى پٸكٸر بٸلدٸرٸپ, روزا كوۋچتٸڭ سٶزٸنە جاۋاپ بەردٸ, دەپ حابارلايدى ult.kz.
ايداربەكوۆا جازباسىندا روزا كوۋچتٸڭ ەيەل ادامنىڭ كٷيەۋٸنەن سۇرانۋىن قۇپتامايتىنىنا قاتىستى ويىن اشىق جەتكٸزگەن.
«سۇرانسا بٸر جەرٸ كەمٸپ قالادى دا, سۇرانباي كەتسە قاراعايداي ماڭدايىنا مٷيٸز شىعادى ما ەكەن?» – دەپ جازدى گٷلزيرا ايداربەكوۆا.
پروديۋسەر جاستاردىڭ ٶز اتا-اناسىن ەمەس, سىرتتان اقىل ايتاتىن ادامداردى تىڭداپ, ٷلكەندٸ سىيلاۋدى ۇمىتىپ بارا جاتقانىنا الاڭدايتىنىن ايتتى.
«جاستار وسىندايدا ٷمٸت ارتىپ, ٶسٸرٸپ وتىرعان ٶز اتا-اناسىن ەمەس, وسىلاي اقىل بەرۋشٸلەردٸ تىڭداپ, ٶزگەرٸپ كەتتٸ. ٷلكەندٸ قۇرمەتتەۋ جوعالىپ, بۇلاي ازعىرۋعا بولمايدى», – دەدٸ ول.
گٷلزيرا ايداربەكوۆا كەلٸندەرٸمەن قارىم-قاتىناسى تۋرالى دا ايتىپ, ٶزٸ ولاردىڭ ەر ٸسٸنە ارالاسا بەرمەيتٸنٸن جەتكٸزدٸ.
«مەن دە ەنەمٸن, كەلٸن ماعان ايتپاق تۇرماق, مەنٸڭ ٶزٸم ايتپاي, ەسكەرتپەي كەتپەيمٸن, بٸزدەر بٸر وتباسى ەمەسپٸز بە», – دەپ جازدى ول.
پروديۋسەر كەلٸندەرٸ ٶزٸنە قوناققا بارعاندا, قولىنا سىيلىق ۇستاتىپ جٸبەرەتٸنٸن ايتىپ, مۇنداي قارىم-قاتىناستى جوعارى باعالايتىنىن جەتكٸزدٸ.
«سودان كەيٸن كەرەمەت كٶڭٸل-كٷيمەن, وسىلاردى بەرە سالعان قۇدايعا راقمەت دەپ, شٷكٸرشٸلٸگٸمدٸ ايتىپ, مەز بولىپ ٷيدەن شىعامىن», – دەدٸ ول.
سونىمەن قاتار گٷلزيرا ايداربەكوۆا روزا كوۋچتٸڭ سٶزٸنە قاتىستى جەكە ۇستانىمىن دا بٸلدٸردٸ.
«كٷيەۋٸنەن سۇرانساڭ نە بولىپتى, بٸر جاعداي بولىپ قالسا, جٷگٸرەتٸنٸ سول وتباسى, كٷيەۋٸڭ ەمەس پە?» – دەپ جازدى ول.
پروديۋسەر روزامەن سىيلاستىق قارىم-قاتىناستا ەكەنٸن اتاپ ٶتٸپ, الايدا بۇل سٶزٸنٸڭ ٶزٸنە اۋىر تيگەنٸن ايتتى.
«مەن روزامەن سىيلاسامىن, بٸراق مىنا سٶزٸ دەنەمدٸ تٸتٸركەنتتٸ», – دەدٸ گٷلزيرا ايداربەكوۆا.
ول سوڭىندا انالار مەن كەلٸندەرگە بٸر-بٸرٸنە قۇرمەتپەن قاراپ, ٶزارا مەنمەندٸك پەن ٶزٸمشٸلدٸكتٸ توقتاتۋعا شاقىردى.
«ەرەگٸستٸ توقتاتىپ, مەنمەندٸكتٸ, ٶزٸمشٸلدٸكتٸ توقتاتىپ, تەك جاقسى ويلارمەن, ول كٸسٸلەرگە دەگەن مەيٸرٸممەن ٶمٸر سٷرٸپ كٶرٸڭٸزشٸ», – دەپ جازدى ول.
