ٸشكٸ ٸستەر مينيسترٸ ەرلان تۇرعىمباەۆ 9-13 ماۋسىم كٷندەرٸ ٸرٸ قالالاردا تٸركەلگەن حالىقتىڭ ميتينگتەرٸنە قاتىستى پٸكٸرٸن بٸلدٸردٸ, دەپ حابارلايدى قازاقپارات.
«9 ماۋسىمنان 13 ماۋسىمعا دەيٸن قر قالالارىندا سانكتسييالانباعان مينينگتەر بولدى. باس پروكۋراتۋرا مەن ٸشكٸ ٸستەر مينيسترلٸگٸنٸڭ بٸرنەشە رەت ەسكەرتۋٸنە قاراماستان, سانكتسييالانباعان ميتينگكە شىققان ازاماتتار ميتينگتەر مەن دەمونستراتسييالار تۋرالى زاڭدى بۇزدى. ول زاڭدا ميتينگتٸ ۇيىمداستىرىپ, وعان شىعۋ ٷشٸن ازاماتتاردىڭ جەرگٸلٸكتٸ اتقارۋشى ورگاندارعا ٶتٸنٸم جازۋى كەرەكتٸگٸ, رۇقسات بەرٸلگەن جاعدايدا اتالعان ميتينگتەردٸ ٶتكٸزۋ كەرەكتٸگٸ ناقتى جازىلعان», - دەدٸ ەرلان تۇرعىمباەۆ ٷكٸمەت وتىرىسىنان كەيٸن تٸلشٸلەردٸڭ سۇراعىنا جاۋاپ بەرە وتىرىپ.
مينيستردٸڭ ايتۋىنشا, باقتار مەن مەدەني شارالار ٶتەتٸن ورىنداردا جاعداي كٷردەلەنٸپ, جوسپارلانعان شارالار ٶتپەي قالعان.
«جول قوزعالىسى شەكتەلٸپ, رەسپۋبليكا داڭعىلىندا تٶرت ساعات بويى قوزعالىس توقتادى. بۇل جاعداي ازاماتتاردىڭ مازاسىن كەتٸردٸ. سول سەبەپتٸ, قۇقىق قورعاۋ ورگاندارى, ونىڭ ٸشٸندە پوليتسييا قىزمەتكەرلەرٸ اتالعان شيەلەنٸستٸ رەتتەۋ, قۇقىقتىڭ قورعالۋىن ساقتاۋ بويىنشا شارالاردى قابىلدادى. پوليتسييا كٷشتەرٸ, ارتىنشا ۇلتتىق گۆاردييا جۇمىلدىرىلدى», - دەدٸ ول.
ونىڭ ايتۋىنشا, ميتينگ كەزٸندە تەرتٸپ ساقشىلارى جاراقات العان.
«بەرٸن دە ٶزدەرٸڭٸز كٶردٸڭٸزدەر. ۆيدەو مەن فوتودا پوليتسيياعا قالاي شابۋىل جاسالىپ جاتقانىن, قالقانداردى تەۋٸپ جاتقانىن, تارتىپ, سوعىپ جاتقانىن كٶردٸڭٸزدەر. نەگٸزٸنەن كٶبٸ جەڭٸل جاراقاتتار. باس مي جاراقاتى, جٸلٸنشٸكتٸڭ سىنۋى جاعدايلارى كەزدەستٸ. سەبەبٸ, دەنە جاراقاتتارى تاياقتان, ارماتۋرا مەن تاستان كەلٸپ جاتتى. كەيبٸر ازاماتتار وسىلاردى پايدالانىپ, جاعدايدى ۋشىقتىرعىسى كەلدٸ.
"ٷش جٷزدەن استام پوليتسييا قىزمەتكەرٸ دەنە جاراقاتىن الدى. ولاردىڭ التاۋى قازٸر گوسپيتالدە جاتىر. بۇل تسيفردى بٸز بۇعان دەيٸن جارييا ەتپەپ ەدٸك, العاش رەت ايتىپ تۇرمىن», - دەدٸ ول.
مينيستردٸڭ ايتۋىنا قاراعاندا, پوليتسيياعا ارنايى قۇرالداردى - گاز قارۋىن, دۋبينكا مەن ٶزگە دە زاتتاردى پايدالانباۋ تۋرالى پەرمەن بەرٸلگەن.
«قازاقستاندىق پوليتسييا ولاردى قولدانبادى. تەك شيەلەنٸستٸ رەتتەۋ ٷشٸن فيزيكالىق كٷش پايدالانىلدى. 4 مىڭعا تارتا ادام ۇستالىپ, 3 ساعاتتىڭ ٸشٸندە 3 مىڭى بوساتىلدى. 677 ادام سوت ارقىلى ارقىلى ەكٸمشٸلٸك قاماۋعا الىندى. 305-نە ايىپپۇل سالىندى», - دەدٸ مينيستر.
