الماتى قالاسىنىڭ باس مەملەكەتتٸك سانيتارلىق دەرٸگەرٸ جانداربەك بەكشين مەكتەپتەردە كوروناۆيرۋستى انىقتايتىن ەكسپرەسس-تەست قولدانۋدى ۇسىندى, دەپ حابارلايدى قازاقپارات.
ونىڭ ايتۋىنشا, ەكسپرەسس-تەست ادام اعزاسىندا كوروناۆيرۋستىڭ بار-جوعىن انىقتاۋعا ٶتە تيٸمدٸ.
«بٸز تٸرٸ ۆيرۋس پەن مۋتاتسييالانعان شتامدارعا زەرتتەۋ جٷرگٸزدٸك. قازاقستانعا ەكەلٸنٸپ, تٸركەۋدەن ٶتكەن بارلىق نەگٸزگٸ ەكسپرەسس-تەستەردٸ زەرتتەپ, جاقسى نەتيجە الدىق. بٷگٸندە ەكسپرەسس-تەستٸلەۋدٸڭ تيٸمدٸلٸگٸ ٶتە جوعارى», - دەدٸ جانداربەك بەكشين وكق-دا ٶتكەن باسپاسٶز مەسليحاتىندا.
سپيكەردٸڭ سٶزٸنشە, مۇنداي تەستتەر قازٸردٸڭ ٶزٸندە رەسەيدە قولدانىلا باستاعان. ال كەلەسٸ اپتانىڭ سوڭىنا دەيٸن قازاقستاندىق مامانداردىڭ ەكسپرەسس-تەستەر بويىنشا زەرتتەۋلەرٸ دەنساۋلىق ساقتاۋ مينيسترلٸگٸنە جولدانادى.
«بٸز مەكتەپتەردە ناۋقاستارمەن بايلانىستا بولعان مىڭداعان ادامدى بايقاپ وتىرمىز. ولاردىڭ بارلىعىن ەكسپرەسس-تەستٸ قولدانىپ, تەكسەرٸپ كٶرۋگە بولادى. ولاردىڭ كٶمەگٸمەن, 15-20 مينۋت ٸشٸندە وقۋشىنىڭ وقۋىن جالعاستىراتىنىن نەمەسە وقشاۋلانۋعا جٸبەرۋ قاجەتتٸگٸن انىقتاۋعا بولادى», - دەيدٸ ول.
سونىمەن قاتار, جانداربەك بەكشين بۇل بيۋدجەتتٸك قاراجاتتىن ٷنەمدەۋگە, سونداي-اق مەديتسينا قىزمەتكەرلەرٸنە تٷسەتٸن جٷكتەمەنٸ ازايتۋعا مٷمكٸندٸك بەرەتٸنٸن تٸلگە تيەك ەتتٸ.
