Almaty qalasynyń bas memlekettik sanitarlyq dárigeri Jandarbek Bekshin mektepterde koronavirýsty anyqtaityn ekspress-test qoldanýdy usyndy, dep habarlaidy QazAqparat.
Onyń aitýynsha, ekspress-test adam aǵzasynda koronavirýstyń bar-joǵyn anyqtaýǵa óte tiimdi.
«Biz tiri virýs pen mýtatsiialanǵan shtamdarǵa zertteý júrgizdik. Qazaqstanǵa ákelinip, tirkeýden ótken barlyq negizgi ekspress-testerdi zerttep, jaqsy nátije aldyq. Búginde ekspress-testileýdiń tiimdiligi óte joǵary», - dedi Jandarbek Bekshin OKQ-da ótken baspasóz máslihatynda.
Spikerdiń sózinshe, mundai testter qazirdiń ózinde Reseide qoldanyla bastaǵan. Al kelesi aptanyń sońyna deiin qazaqstandyq mamandardyń ekspress-tester boiynsha zertteýleri Densaýlyq saqtaý ministrligine joldanady.
«Biz mektepterde naýqastarmen bailanysta bolǵan myńdaǵan adamdy baiqap otyrmyz. Olardyń barlyǵyn ekspress-testi qoldanyp, tekserip kórýge bolady. Olardyń kómegimen, 15-20 minýt ishinde oqýshynyń oqýyn jalǵastyratynyn nemese oqshaýlanýǵa jiberý qajettigin anyqtaýǵa bolady», - deidi ol.
Sonymen qatar, Jandarbek Bekshin bul biýdjettik qarajattyn únemdeýge, sondai-aq meditsina qyzmetkerlerine túsetin júktemeni azaitýǵa múmkindik beretinin tilge tiek etti.
