پارلامەنت مەجٸلٸسٸ بٷگٸن قازاقستان پرەزيدەنتتٸگٸنە ٷمٸتكەرلەرگە قوسىمشا تالاپتار قويۋدى قاراستىراتىن كەيبٸر زاڭدارعا ٶزگەرٸستەر مەن تولىقتىرۋلار ەنگٸزۋ تۋرالى كونستيتۋتسييالىق زاڭ جوباسىن ماقۇلدادى, دەپ حابارلايدى "ۇلت اقپارات" ازاتتىققا سٸلتەمە جاساپ.
مەجٸلٸستە زاڭ جوباسىن تانىستىرعان ەدٸلەت مينيسترٸ مارات بەكەتاەۆتىڭ ايتۋىنشا, جوبادا پرەزيدەنتتٸككە ٷمٸتكەرلەرگە قويىلاتىن تالاپتار كٷشەيتۋ قاراستىرىلعان. اتاپ ايتقاندا, ازاماتتاردىڭ پرەزيدەنتتٸككە كانديدات رەتٸندە ٶزٸن-ٶزٸ ۇسىنۋىنا تىيىم سالۋ قاراستىرىلعان. بەكەتاەۆتىڭ سٶزٸنشە, پرەزيدەنتتٸككە كانديداتتاردى قوعامدىق بٸرلەستٸكتەر مەن ساياسي پارتييالار عانا ۇسىنا الادى.
جوباعا ساي, سونىمەن قاتار كانديداتتارعا مەملەكەتتٸك قىزمەت نەمەسە سايلاناتىن مەملەكەتتٸك لاۋازىمدى قىزمەت اتقارعان كەم دەگەندە بەس جىل تەجٸريبەسٸ بولۋى, پرەزيدەنتتٸك مٸندەتٸن اتقارۋىنا كەدەرگٸ كەلتٸرەتٸن اۋرۋى جوقتىعىن راستاۋ تۋرالى تالاپتار ەنگٸزۋ قاراستىرىلعان. كانديدات مٸندەتتٸ مەديتسينالىق تەكسەرۋدەن ٶتكٸزٸلەدٸ. بۇل تالاپ "سايلاۋ تۋرالى" زاڭعا ەنگٸزٸلمەك.
قازاقستاندا بيىل كٶكتەمدە كونستيتۋتسيياعا پرەزيدەنتتٸڭ كەيبٸر ٶكٸلەتتٸكتەرٸن ٷكٸمەت پەن پارلامەنتكە بٶلٸپ بەرۋدٸ قاراستىراتىن ٶزگەرٸستەر مەن تولىقتىرۋلار ەنگٸزٸلگەن.
