Parlament májilisi búgin Qazaqstan prezidenttigine úmitkerlerge qosymsha talaptar qoiýdy qarastyratyn keibir zańdarǵa ózgerister men tolyqtyrýlar engizý týraly konstitýtsiialyq zań jobasyn maquldady, dep habarlaidy "Ult aqparat" Azattyqqa silteme jasap.
Májiliste zań jobasyn tanystyrǵan ádilet ministri Marat Beketaevtyń aitýynsha, jobada prezidenttikke úmitkerlerge qoiylatyn talaptar kúsheitý qarastyrylǵan. Atap aitqanda, azamattardyń prezidenttikke kandidat retinde ózin-ózi usynýyna tyiym salý qarastyrylǵan. Beketaevtyń sózinshe, prezidenttikke kandidattardy qoǵamdyq birlestikter men saiasi partiialar ǵana usyna alady.
Jobaǵa sai, sonymen qatar kandidattarǵa memlekettik qyzmet nemese sailanatyn memlekettik laýazymdy qyzmet atqarǵan kem degende bes jyl tájiribesi bolýy, prezidenttik mindetin atqarýyna kedergi keltiretin aýrýy joqtyǵyn rastaý týraly talaptar engizý qarastyrylǵan. Kandidat mindetti meditsinalyq tekserýden ótkiziledi. Bul talap "Sailaý týraly" zańǵa engizilmek.
Qazaqstanda biyl kóktemde konstitýtsiiaǵa prezidenttiń keibir ókilettikterin úkimet pen parlamentke bólip berýdi qarastyratyn ózgerister men tolyqtyrýlar engizilgen.
