اۋا رايىنىڭ سالقىندىعىنا, پوليتسييانىڭ ەسكەرتۋٸنە قاراماستان, 23 قاڭتاردا مەسكەۋدەگٸ پۋشكين الاڭىندا ونداعان مىڭ ادام جينالىپ, وپپوزيتسييالىق ساياساتكەر الەكسەي ناۆالنىيدى بوساتۋدى تالاپ ەتتٸ. پوليتسييا جينالعانداردى رەزەڭكە شوقپارمەن ۇرىپ, كٷش قولدانىپ, تاراتۋعا تىرىستى.
Reuters اگەنتتٸگٸنٸڭ ەسەپتەۋٸنشە, مەسكەۋدەگٸ نارازىلىق شاراسىنا 40 مىڭعا جۋىق ادام قاتىسقان. رەسەي ٸشكٸ ٸستەر مينيسترلٸگٸ ەل استاناسىنداعى جيىنعا 4 مىڭ كٸسٸ كەلدٸ دەگەن اقپار تاراتتى.
جۋرناليستەر بٷگٸنگٸ جيىندى 2017 جىلدان بەرگٸ ەڭ ٸرٸ نارازىلىق اكتسيياسى دەپ اتادى.
AFP اگەنتتٸگٸنٸڭ حابارلاۋىنشا, مەسكەۋدەگٸ جيىندا پوليتسييا مەن دەمونسترانتتار اراسىندا قاقتىعىس بولىپ, تەرتٸپ ساقشىلارى كٷش قولدانعان. پوليتسييا جاساعى الاڭداعى ادامداردى ۇستاۋ كەزٸندە دە كٷش قولدانىپ جاتىر. "وفد-ينفو" توبىنىڭ ەسەپتەۋٸ بويىنشا, بٷكٸل رەسەي اۋماعىندا ۇستالعاندار سانى 1100 ادامعا جەتتٸ. بۇل سان ەلٸ دە ٶسٸپ جاتىر.
پوليتسييا ۇستاپ ەكەتكەندەر اراسىندا ناۆالنىيدىڭ ەيەلٸ يۋلييا ناۆالنايا مەن "جەمقورلىقپەن كٷرەس" قورىنىڭ زاڭگەرٸ ليۋبوۆ سوبول بار. سوبول پۋشكين الاڭىندا ناۆالنىي جاقتاستارى الدىندا سٶز سٶيلەپ جاتقان كەزٸندە ۇستالدى. وسى وقيعادان سوڭ جينالعان جۇرت "ليۋبا! ليۋبا!" دەپ ايقايلاي باستادى.
- 23 قاڭتاردا وپپوزيتسيياشىل ساياساتكەر الەكسەي ناۆالنىيدىڭ جاقتاستارى ونى قولداۋ ٷشٸن جالپىۇلتتىق قارسىلىق اكتسيياسىن ۇيىمداستىرىپ جاتىر. ەلدٸڭ تٷكپٸر-تٷكپٸرٸندە مىڭداعان ادام قاتىسقان ميتينگٸلەر ٶتٸپ, جٷزدەگەن ادام ۇستالدى.
- "نوۆيچوك" ۋىمەن ۋلانىپ, اۋرۋحاناعا تٷسكەن الەكسەي ناۆالنىي گەرمانييادا ەمدەلٸپ, 17 قاڭتاردا رەسەيگە كەلگەن بەتتە مەسكەۋ ەۋەجايىندا ۇستالعان.
- قيىر شىعىس پەن سٸبٸردە مىڭداعان ادام قاتىسقان جيىندار. مەسكەۋدٸڭ پۋشكين الاڭىندا, سانكت-پەتەربۋرگتىڭ سەنات الاڭىندا جيىن ەلٸ جالعاسىپ جاتىر. پوليتسييا جيىن باستالماي جاتىپ بەلسەندٸلەردٸ ۇستاي باستاعان.
