فوتو: © Sputnik / ۆيتاليي انكوۆ
اقتاۋ گارنيزونىنىڭ باس ەسكەري پروكۋرورى ەرلان قۇتقوجا "ويماشا" وقۋ پوليگونىندا بولعان قايعىلى وقيعانىڭ مەن-جايىن ايتىپ بەردٸ, دەپ حابارلايدى Sputnik قازاقستان سايتى Lada.kz پورتالىنا سٸلتەمە جاساپ.
قازٸرگٸ كەزدە ساربازدىڭ ٶلٸمٸ بويىنشا سوتقا دەيٸنگٸ تەرگەۋ شارالارى جٷرگٸزٸلٸپ جاتىر. باس ەسكەري پروكۋراتۋرا مەن اقتاۋ گارنيزونىنىڭ پروكۋراتۋراسى بۇل ٸستٸ ەرەكشە باقىلاۋدا ۇستاپ وتىر.
"قىلمىستىق كودەكستٸڭ 453-بابى, 2-بٶلٸگٸ (قىزمەتكە سالعىرت قاراۋ, ادام ٶلٸمٸنە ەكەپ سوققان ەرەكەت) بويىنشا ٸس قوزعالدى. كەشە ٶلٸمنٸڭ ناقتى سەبەبٸن انىقتاۋ ٷشٸن مەيٸتكە اۋتوپسييا جاسالدى. قازٸرگٸ كەزدە ساراپتامانىڭ نەتيجەسٸن كٷتٸپ وتىرمىز. جارىقشاقتار تابىلعان جاعدايدا قوسىمشا ساراپتاما تاعايىندالادى. سەبەبٸ بٶگدە زاتتىڭ قۇرامى مەن شىققان جەرٸن انىقتاۋ قاجەت", - دەدٸ قۇتقوجا.
ونىڭ ايتۋىنشا, جارىلىس پوليگوننىڭ وقۋ-جاتتىعۋلار ٶتەتٸن جەردە ەمەس, باسقا جاعىندا بولعان. سول كەزدە ساربازدار تۇرمىستىق كٷل-قوقىستى جيناپ جٷرگەن.
"جارىلىس كەزٸندە كەلٸسٸمشارت بويىنشا ەسكەري قىزمەتشٸ, 2000 جىلى تۋعان سەرجانت تا جاراقات الدى. وعان جەلكە تۇسىنان تيگەن. قازٸر ول اۋرۋحانادا, جاعدايى جاقسى, ٶمٸرٸ مەن دەنساۋلىعىنا قاۋٸپ تٶنٸپ تۇرعان جوق", - دەپ اتاپ كٶرسەتتٸ گارنيزونىنىڭ باس ەسكەري پروكۋرورى.
جاراقات العان ەسكەري قىزمەتشٸنٸڭ جاعدايى جاقسارعاسىن ودان جاۋاپ الىنادى.
ايتا كەتەرٸ, 30 قىركٷيەكتە اقتاۋ گارنيزونىندا بەلگٸسٸز زات جارىلدى. اۋىر جاراقات العان ەسكەري قىزمەتشٸ اۋرۋحاناعا بارا جاتقان جولدا قايتىس بولدى.
