Foto: © Sputnik / Vitalii Ankov
Aqtaý garnizonynyń bas áskeri prokýrory Erlan Qutqoja "Oimasha" oqý poligonynda bolǵan qaiǵyly oqiǵanyń mán-jaiyn aityp berdi, dep habarlaidy Sputnik Qazaqstan saity Lada.kz portalyna silteme jasap.
Qazirgi kezde sarbazdyń ólimi boiynsha sotqa deiingi tergeý sharalary júrgizilip jatyr. Bas áskeri prokýratýra men Aqtaý garnizonynyń prokýratýrasy bul isti erekshe baqylaýda ustap otyr.
"Qylmystyq kodekstiń 453-baby, 2-bóligi (Qyzmetke salǵyrt qaraý, adam ólimine ákep soqqan áreket) boiynsha is qozǵaldy. Keshe ólimniń naqty sebebin anyqtaý úshin máiitke aýtopsiia jasaldy. Qazirgi kezde saraptamanyń nátijesin kútip otyrmyz. Jaryqshaqtar tabylǵan jaǵdaida qosymsha saraptama taǵaiyndalady. Sebebi bógde zattyń quramy men shyqqan jerin anyqtaý qajet", - dedi Qutqoja.
Onyń aitýynsha, jarylys poligonnyń oqý-jattyǵýlar ótetin jerde emes, basqa jaǵynda bolǵan. Sol kezde sarbazdar turmystyq kúl-qoqysty jinap júrgen.
"Jarylys kezinde kelisimshart boiynsha áskeri qyzmetshi, 2000 jyly týǵan serjant ta jaraqat aldy. Oǵan jelke tusynan tigen. Qazir ol aýrýhanada, jaǵdaiy jaqsy, ómiri men densaýlyǵyna qaýip tónip turǵan joq", - dep atap kórsetti garnizonynyń bas áskeri prokýrory.
Jaraqat alǵan áskeri qyzmetshiniń jaǵdaiy jaqsarǵasyn odan jaýap alynady.
Aita keteri, 30 qyrkúiekte Aqtaý garnizonynda belgisiz zat jaryldy. Aýyr jaraqat alǵan áskeri qyzmetshi aýrýhanaǵa bara jatqan jolda qaitys boldy.
