قر باس پروكۋرورىنىڭ ورىنباسارى مارات احمەتجانوۆ اۋىر قىلمىستار ٷشٸن جازانى قاتايتاتىن زاڭ جوباسىن تانىستىردى, دەپ حابارلايدى قازاقپارات تٸلشٸسٸ.
«جاڭا زاڭ جوباسىندا مال ۇرلىعى بويىنشا جەكە قۇرام ەنگٸزٸلگەن. ۇرلىق, توناۋ, شابۋىل ەرەكەتتەرٸ عيماراتقا, قويماعا نەمەسە كٶلٸككە باسىپ كٸرۋ ارقىلى ارقىلى جاسالعان جاعدايدا جازا قاتايتىلادى. بۇل قىلمىستاردى اۋىر ساناتقا جاتقىزۋ كٶزدەلگەن. ياعني, اۋىر قىلمىس ساناتىنا جاتقاندىقتان, ونداي قالمىس جاساعاندار زارداپ شەگۋشٸمەن تاتۋلاسۋ ارقىلى نەمەسە زارداپتىڭ ورنىن تولتىرۋ ارقىلى جازادان جالتارۋ مٷمكٸندٸگٸنەن ايىرىلادى», - دەگەن مارات احمەتجانوۆ بۇل ۇسىنىستارىنىڭ سەبەبٸن دە تٷسٸندٸردٸ.
«قازاق بٸر-بٸرٸنە «مال-جان امان با» دەپ امانداسادى. ەلٸمٸزدە ازاماتتاردىڭ 40 پايىزى اۋىل تٶڭٸرەگٸندە تۇرادى. مال - اۋىل ٶمٸرٸنٸڭ تٸرەگٸ, كٸرٸسٸنٸڭ كٶزٸ. سوندىقتان مال ۇرلىعىن قىلمىستىق توپپەن ۇيىمداسىپ جاساعان جاعدايدا ول اۋىر قىلمىس ساناتىنا جاتقىزىلادى. ٶيتكەنٸ, مال ۇرلىعى كەسٸپكە اينالعان. شىعارىپ بەرەتٸن بٸرەۋ بار, سوياتىن بٸرەۋ بار, تاسىمالدايتىن بٸرەۋ بار, بازاردا ساتاتىن بٸرەۋ بار, جالعان انىقتاما الىپ بەرەتٸن تاعى بٸرەۋ بار. سوندىقتان, ونى اۋىر قىلمىسقا جاتقىزىپ وتىرمىز. ٶيتكەنٸ, مال ۇرلىعى بويىنشا ۇيىمداسقان قىلمىستىق توپتار پايدا بولىپ وتىر», - دەدٸ پروكۋراتۋرا ٶكٸلٸ.
