فوتو: 24.kz
21 مامىر – مەدەنيەت جەنە ٶنەر قىزمەتكەرلەرٸ كٷنٸ. بۇل مەرەكە – ۇلت رۋحانيياتىنىڭ ٶركەندەۋٸنە, مەدەني مۇرانى ساقتاۋ مەن ناسيحاتتاۋعا ٶلشەۋسٸز ٷلەس قوسىپ كەلە جاتقان مەدەنيەت جەنە ٶنەر سالاسى قىزمەتكەرلەرٸنە قۇرمەت كٶرسەتۋ كٷنٸ, دەپ جازادى Ult.kz.
بٷگٸندە ەلٸمٸزدە 7 600 مەدەنيەت مەكەمەسٸ جۇمىس ٸستەيدٸ. اتاپ ايتقاندا, 3 890 كٸتاپحانا, 57 تەاتر, 231 ارحيۆ, 275 مۋزەي, 2 994 مەدەني-دەمالىس ورتالىعى, 113 كينوتەاتر, 36 كونتسەرتتٸك ۇيىم جەنە 4 تسيرك بار. سالادا 58 مىڭنان استام مامان قىزمەت اتقارادى. قازاقستاننىڭ مەدەنيەت سالاسىندا ەلدٸڭ رۋحاني جەنە مەدەني-تاريحي مۇراسىن حالىقارالىق دەڭگەيدە ناسيحاتتاۋعا باعىتتالعان اۋقىمدى جۇمىستار اتقارىلۋدا.
مەدەنيەت جەنە ٶنەر قىزمەتكەرلەرٸنٸڭ كەسٸبي مەرەكەسٸ قارساڭىندا اقوردادا سالتاناتتى جيىن ٶتكەن بولاتىن. پرەزيدەنت ۇلتىمىزدىڭ بولمىس-بٸتٸمٸن ساقتاۋعا, حالقىمىزدىڭ رۋحانيياتىن بايىتۋعا زور ٷلەس قوسىپ جٷرگەن سالا قىزمەتكەرلەرٸنە ريزاشىلىعىن بٸلدٸردٸ.
«مەدەنيەت – ۇلتتىڭ تٶلقۇجاتى. جاھان جۇرتى ەلٸمٸزدٸ, ەڭ الدىمەن, ٶنەرٸمٸز ارقىلى تانىپ بٸلەدٸ. بٸز – ۇلى دالادا تامىر جايعان بٸرەگەي مەدەنيەتتٸڭ زاڭدى مۇراگەرٸمٸز. قازاق جەرٸنەن شىققان قايتالانباس ٶنەر يەلەرٸنٸڭ تەڭدەسسٸز تۋىندىلارى تۇتاس ۇلتتى تەربيەلەدٸ. قازٸر تٶل مەدەنيەتٸمٸز دٷنيە جٷزٸنە تانىلىپ جاتىر. تالانتتى مۋزىكانتتارىمىز ەلەمدٸك ساحنالاردا تابىستى ٶنەر كٶرسەتٸپ جٷر. قازاق كينوگەرلەرٸ تٷرلٸ حالىقارالىق بايقاۋلارعا قاتىسىپ, ساراپشىلاردىڭ جوعارى باعاسىنا يە بولۋدا. ەلوردامىزدا دٷنيەجٷزٸلٸك كٶشپەندٸلەر ويىندارى تابىستى ٶتتٸ. اقتاۋ قالاسى تٷركٸ ەلەمٸنٸڭ مەدەني استاناسى بولىپ جارييالاندى. رۋحاني مۇرالارىمىز تسيفرلىق فورماتقا كٶشٸرٸلە باستادى. تاياۋدا ۇلتىمىزدىڭ بٸر جارىم مىڭ ەن-كٷيٸ مەن فولكلورلىق مۇراسى ەڭ تانىمال حالىقارالىق پلاتفورمالارعا سالىندى. تٶل ٶنەرٸمٸز كرەاتيۆتٸ يندۋسترييا ارقىلى بارىنشا ناسيحاتتالۋدا», – دەدٸ پرەزيدەنت ق.توقاەۆ.
وسى ورايدا Ult.kz تٸلشٸسٸ ٶنەر ادامدارىنان وسى كٷننٸڭ ماڭىزى تۋرالى سۇراپ كٶردٸ.
فوتو: yandex.kz
قايرات بايبوسىنوۆ, «قازاقستاننىڭ ەڭبەك ەرٸ» جەنە «وتان» وردەنٸنٸڭ يەگەرٸ:
ٶنەر دەگەن قاشاندا حالىقتان, ٷكٸمەتتەن قولداۋ كٷتەدٸ. ٶيتكەنٸ ٶنەرپازدار شاماسى كەلگەنشە حالىققا, ەلگە, جەرگە ەڭبەك ەتٸپ جٷر. ٶنەر دەگەن قازاقتىڭ جانى, جٷرەگٸ, ايناسى. سوندىقتان بۇل كٷننٸڭ اتالاتىنى جاقسى, ەرينە. ارنايى كٷندٸ بەلگٸلەپ, مەرەكە ەتٸپ قويعاننان كەيٸن, ٶنەر ادامدارىنىڭ دا جٷرەگٸنە قۋانىش ۇيالايدى, كٶڭٸلدەرٸ كٶتەرٸلٸپ, بٸر-بٸرٸن قۇتتىقتايدى. ٶنەر ادامدارىنىڭ ەڭبەگٸن باعالاپ, ولارعا شابىت, تالپىنىس بەرەتٸن كٷن عوي. وسى كٷنٸ ٶنەر ادامدارى ايرىقشا كٷتەمٸز. ساحنادا جٷرگەندەر بار, كونتسەرۆاتورييا بار, استاناداعى ٶنەر ۋنيۆەرسيتەتٸ بار, ەر وبلىستا ٶنەر وشاقتارى بار. مٸنە, سولاردىڭ, ٶنەر ادامدارىنىڭ, شەكٸرتتەرٸنٸڭ, ٶنەر سٷيەر قاۋىمنىڭ قۋانىشى.
فوتو: nege.kz
كٷنسۇلۋ تۇرعىنبەكقىزى, «ەرەن ەڭبەگٸ ٷشٸن» مەدالٸنٸڭ يەگەرٸ:
بٷگٸنگٸ ايتۋلى مەرەكەمەن بارلىق مەدەنيەت جەنە ٶنەر سالاسىندا قىزمەت ەتٸپ جٷرگەن, ساحنالاس جانداردى, ٶنەرسٷيەر قاۋىمدى, ٶنەردٸڭ شىنايى جاناشىرلارىن قۇتتىقتاعىم كەلەدٸ. بۇل تەك ٶنەردە, ساحنادا ەركەلەپ جٷرگەن, ەنٸن ايتىپ, بيٸن بيلەپ, وبرازدار سومداپ جٷرگەن اكتەر, ەنشٸ, بيشٸ, كٷيشٸلەرگە عانا قاتىستى ەمەس, بۇل ساحنانىڭ ارتىندا دا جٷرەتٸن كٶركەمدٸلٸكتٸڭ بيٸك دەڭگەيٸنە جەتۋٸنە ٷلەس قوساتىن ساحناگەرلەر, رەكۆيزيت, قويۋشىلار, كٶركەمسۋرەتشٸلەر, كوستيۋمشٸلەر, گريمشٸلەر, كيمٸ تٸگۋ تسەحى, بەرٸنە ورتاق مەرەكە. نەگٸزٸ مەرەكە وسى كٸسٸلەردٸكٸ دەپ ويلايمىن. ٶيتكەنٸ ولار كٷن دەمەي, تٷن دەمەي, اۋقىمدى دٷنيەنٸ شىعارۋىمىزعا ٷلەس قوسادى, ەڭبەك ەتەدٸ. جالپى, كٷننٸڭ قايسىن الساڭ دا مەرەكە عوي. ال وسىنداي مەملەكەتتٸك دەڭگەيدە اتالىپ ٶتٸپ جاتقاننان كەيٸن, وعان دا ەرەكشە قۋانامىز, ريزاشىلىعىمىزدى بٸلدٸرەمٸز. سىي-سيياپاتتارىن بەرٸپ جاتادى.
فوتو: qazaqjoly.kz
بولات ەبدٸلمانوۆ, قازاقستاننىڭ ەڭبەك سٸڭٸرگەن قايراتكەرٸ, «قۇرمەت» جەنە «پاراسات» وردەندەرٸنٸڭ يەگەرٸ:
قاي ەلدٸڭ مەدەنيەتٸ مىقتى دامىسا, ول ەلدٸڭ ەڭسەسٸ دە بيٸك, رۋحى دا جوعارى بولادى. سونىمەن قاتار, مەدەنيەت – ادامزات تۇلعاسى دەڭگەيٸنە كٶتەرەتٸن نەگٸزگٸ قۇرال. مەدەنيەتتٸڭ ٶزەكتٸ بٶلٸگٸ – ٶنەر. شىنىندا دا ٶنەر مەدەنيەتتٸڭ التىن قازىناسى, ادامنىڭ ۇلىلىعىن بٸلدٸرەتٸن عاجاپ كٶرٸنٸستەردٸڭ بٸرٸ. يە, بۇل شىن مەنٸندە ٶنەرگە, مەدەنيەتكە قولداۋ عوي. مۇنداي كٷننٸڭ بار ەكەنٸ مەدەنيەت قىزمەتكەرلەرٸنە ٷلكەن باعا, قۇرمەت دەپ بٸلەمٸن. بولعانى دۇرىس. قازٸر ەر ەلدٸڭ مەدەني دامۋى سول ەلدٸڭ جارقىن بولاشاعىنىڭ كٶرٸنٸسٸ. مۇنداي مەرەكەنٸڭ بولۋى, ەلٸمٸزدەگٸ مەدەني قىزمەتكەرلەردٸڭ عانا ەمەس, ٸشكٸ مەدەنيەتٸ جوعارى ەربٸر ازامات ٷشٸن ماڭىزدى.
اقبوتا مۇسابەكقىزى
