Foto: 24.kz
21 mamyr – Mádeniet jáne óner qyzmetkerleri kúni. Bul mereke – ult rýhaniiatynyń órkendeýine, mádeni murany saqtaý men nasihattaýǵa ólsheýsiz úles qosyp kele jatqan mádeniet jáne óner salasy qyzmetkerlerine qurmet kórsetý kúni, dep jazady Ult.kz.
Búginde elimizde 7 600 mádeniet mekemesi jumys isteidi. Atap aitqanda, 3 890 kitaphana, 57 teatr, 231 arhiv, 275 mýzei, 2 994 mádeni-demalys ortalyǵy, 113 kinoteatr, 36 kontserttik uiym jáne 4 tsirk bar. Salada 58 myńnan astam maman qyzmet atqarady. Qazaqstannyń mádeniet salasynda eldiń rýhani jáne mádeni-tarihi murasyn halyqaralyq deńgeide nasihattaýǵa baǵyttalǵan aýqymdy jumystar atqarylýda.
Mádeniet jáne óner qyzmetkerleriniń kásibi merekesi qarsańynda Aqordada saltanatty jiyn ótken bolatyn. Prezident ultymyzdyń bolmys-bitimin saqtaýǵa, halqymyzdyń rýhaniiatyn baiytýǵa zor úles qosyp júrgen sala qyzmetkerlerine rizashylyǵyn bildirdi.
«Mádeniet – ulttyń tólqujaty. Jahan jurty elimizdi, eń aldymen, ónerimiz arqyly tanyp biledi. Biz – Uly dalada tamyr jaiǵan biregei mádeniettiń zańdy muragerimiz. Qazaq jerinen shyqqan qaitalanbas óner ieleriniń teńdessiz týyndylary tutas ultty tárbieledi. Qazir tól mádenietimiz dúnie júzine tanylyp jatyr. Talantty mýzykanttarymyz álemdik sahnalarda tabysty óner kórsetip júr. Qazaq kinogerleri túrli halyqaralyq baiqaýlarǵa qatysyp, sarapshylardyń joǵary baǵasyna ie bolýda. Elordamyzda Dúniejúzilik kóshpendiler oiyndary tabysty ótti. Aqtaý qalasy túrki áleminiń mádeni astanasy bolyp jariialandy. Rýhani muralarymyz tsifrlyq formatqa kóshirile bastady. Taiaýda ultymyzdyń bir jarym myń án-kúii men folklorlyq murasy eń tanymal halyqaralyq platformalarǵa salyndy. Tól ónerimiz kreativti indýstriia arqyly barynsha nasihattalýda», – dedi Prezident Q.Toqaev.
Osy oraida Ult.kz tilshisi óner adamdarynan osy kúnniń mańyzy týraly surap kórdi.
Foto: yandex.kz
Qairat Baibosynov, «Qazaqstannyń Eńbek Eri» jáne «Otan» ordeniniń iegeri:
Óner degen qashanda halyqtan, úkimetten qoldaý kútedi. Óitkeni ónerpazdar shamasy kelgenshe halyqqa, elge, jerge eńbek etip júr. Óner degen qazaqtyń jany, júregi, ainasy. Sondyqtan bul kúnniń atalatyny jaqsy, árine. Arnaiy kúndi belgilep, mereke etip qoiǵannan keiin, óner adamdarynyń da júregine qýanysh uialaidy, kóńilderi kóterilip, bir-birin quttyqtaidy. Óner adamdarynyń eńbegin baǵalap, olarǵa shabyt, talpynys beretin kún ǵoi. Osy kúni óner adamdary airyqsha kútemiz. Sahnada júrgender bar, kontservatoriia bar, Astanadaǵy óner ýniversiteti bar, ár oblysta óner oshaqtary bar. Mine, solardyń, óner adamdarynyń, shákirtteriniń, óner súier qaýymnyń qýanyshy.
Foto: nege.kz
Kúnsulý Turǵynbekqyzy, «Eren eńbegi úshin» medaliniń iegeri:
Búgingi aitýly merekemen barlyq Mádeniet jáne óner salasynda qyzmet etip júrgen, sahnalas jandardy, ónersúier qaýymdy, ónerdiń shynaiy janashyrlaryn quttyqtaǵym keledi. Bul tek ónerde, sahnada erkelep júrgen, ánin aityp, biin bilep, obrazdar somdap júrgen akter, ánshi, bishi, kúishilerge ǵana qatysty emes, bul sahnanyń artynda da júretin kórkemdiliktiń biik deńgeiine jetýine úles qosatyn sahnagerler, rekvizit, qoiýshylar, kórkemsýretshiler, kostiýmshiler, grimshiler, kimi tigý tsehy, bárine ortaq mereke. Negizi mereke osy kisilerdiki dep oilaimyn. Óitkeni olar kún demei, tún demei, aýqymdy dúnieni shyǵarýymyzǵa úles qosady, eńbek etedi. Jalpy, kúnniń qaisyn alsań da mereke ǵoi. Al osyndai memlekettik deńgeide atalyp ótip jatqannan keiin, oǵan da erekshe qýanamyz, rizashylyǵymyzdy bildiremiz. Syi-siiapattaryn berip jatady.
Foto: qazaqjoly.kz
Bolat Ábdilmanov, Qazaqstannyń eńbek sińirgen qairatkeri, «Qurmet» jáne «Parasat» ordenderiniń iegeri:
Qai eldiń mádenieti myqty damysa, ol eldiń eńsesi de biik, rýhy da joǵary bolady. Sonymen qatar, mádeniet – adamzat tulǵasy deńgeiine kóteretin negizgi qural. Mádeniettiń ózekti bóligi – óner. Shynynda da óner mádeniettiń altyn qazynasy, adamnyń ulylyǵyn bildiretin ǵajap kórinisterdiń biri. Iá, bul shyn máninde ónerge, mádenietke qoldaý ǵoi. Mundai kúnniń bar ekeni mádeniet qyzmetkerlerine úlken baǵa, qurmet dep bilemin. Bolǵany durys. Qazir ár eldiń mádeni damýy sol eldiń jarqyn bolashaǵynyń kórinisi. Mundai merekeniń bolýy, elimizdegi mádeni qyzmetkerlerdiń ǵana emes, ishki mádenieti joǵary árbir azamat úshin mańyzdy.
Aqbota Musabekqyzy
