فوتو: قر مام
قر ورتالىق مەملەكەتتٸك كينو-فوتوقۇجاتتار مەن دىبىس جازبالارى ارحيۆٸنٸڭ قىزمەتكەرلەرٸ ليتۆا رەسپۋبليكاسىندا جٷرگٸزگەن عىلىمي-زەرتتەۋ جۇمىستارى بارىسىندا ەلٸمٸزدٸڭ تاريحى مەن مەدەنيەتٸنە قاتىستى دەرەكتەر انىقتادى, دەپ حابارلايدى Ult.kz.
انىقتالعان قۇجاتتار قاتارىندا 1975 جىلى ۆيلنيۋس قالاسىندا ٶتكەن قازاق كينوسىنىڭ كٷندەرٸنە بايلانىستى, ش.ايمانوۆ اتىنداعى «قازاقفيلم» كينوستۋديياسى دەلەگاتسيياسىنىڭ ليتۆاعا ساپارى, قازاق كسر-نٸڭ حالىق ەرتٸسٸ نۇرمۇحان جانتٶرين مەن قازاق كسر-نٸڭ اباي اتىنداعى مەملەكەتتٸك سىيلىعىنىڭ لاۋرەاتى, رەجيسسەر سۇلتان قوجىقوۆتىڭ ليتۆالىقتارمەن كەزدەسۋلەرٸ تۋرالى دەرەكتٸ ماتەريالدار بار.
فوتو: قر مام
سونداي-اق بۇرىنعى كٶكشەتاۋ وبلىسىنداعى تىڭ يگەرۋ جۇمىستارىنا ليتۆالىق مامانداردىڭ قاتىسقانى تۋرالى دا قۇندى مەلٸمەتتەر تابىلدى. اتاپ ايتقاندا, ولاردىڭ مەكتەپ جانىنداعى لاگەرلەردە, مەديتسينا پۋنكتتەرٸندە, قۇرىلىس سالاسىندا ەڭبەك ەتكەنٸ جەنە قازاق حالقىنىڭ سالت-دەستٷرٸمەن تانىسقانى جٶنٸندەگٸ قۇندى دەرەكتەر كەزدەسەدٸ.
فوتو: قر مام
زەرتتەۋ جۇمىستارىن قر ورتالىق مەملەكەتتٸك كينو-فوتوقۇجاتتار مەن دىبىس جازبالارى ارحيۆٸ ديرەكتورىنىڭ ورىنباسارى, تاريح عىلىمدارىنىڭ كانديداتى سەۋلە ساتاەۆا جٷرگٸزٸپ, ۆيلنيۋس, كاۋناس جەنە كلايپەدا قالالارىنداعى ورتالىق مەملەكەتتٸك ارحيۆتەرٸندە بولدى.
ساپار بارىسىندا ايماقتىق ارحيۆ باسشىلارىمەن كەزدەسۋلەر ٶتٸپ, ەكٸجاقتى ىنتىماقتاستىق مەسەلەلەرٸ تالقىلاندى. نەتيجەسٸندە XIX عاسىردىڭ سوڭى مەن XX عاسىردىڭ باسىنداعى قازاق جەنە ليتۆالىق ەيەلدەردٸڭ بەينەسٸنە ارنالعان فوتوكٶرمە ۇيىمداستىرۋ جٶنٸندە كەلٸسٸم جاسالدى.
