بٸشكەكتٸڭ پەرۆومايسكيي اۋداندىق سوتى قىرعىزستاننىڭ بۇرىنعى پرەمەر-مينيسترٸ ساپار يساكوۆتى "استاناداعى تاريح مۋزەيٸن جٶندەۋ كەزٸندە جەنە شولپان-اتاداعى يپپودروم قۇرىلىسى كەزٸندە اقشا جىمقىرۋعا قاتىسى بار" دەگەن ايىپتاپ, 18 جىلعا سوتتادى. بۇل تۋرالى ازاتتىقتىڭ قىرعىز قىزمەتٸ حابارلادى.
"وسىعان دەيٸن شىققان سوت ٷكٸمٸندەگٸ جازامەن جارتىلاي بٸرٸكتٸرٸپ, يساكوۆقا 18 جىل باس بوستاندىعىنان ايىرۋ تاعايىندالسىن. جازانى ٶتەۋ 2018 جىلدىڭ 5 ماۋسىمىنان ەسەپتەلسٸن" دەدٸ سۋديا مارات سىدىكوۆ.
سوت يساكوۆقا 247 ملن 650 مىڭ سوت (شامامەن 3,35 ملن دوللار) ايىپپۇل سالدى.
سوت وسى ٸس بويىنشا ەكٸنشٸ ايىپتالۋشى – پرەزيدەنت ەكٸمشٸلٸگٸنٸڭ ازاماتتىق دامۋ, دٸن جەنە ەتنيكالىق ساياسات بٶلٸمٸنٸڭ جەتەكشٸسٸ ميرا كارىباەۆاعا 247 ملن سوم (3,3 ملن دوللار) ايىپپۇل سالدى.
2019 جىلى جەلتوقساندا ەكس-پرەمەر سۆەردلوۆسكيي اۋداندىق سوتىنىڭ ٷكٸمٸمەن بٸشكەكتەگٸ جىلۋ ەلەكتر ورتالىعىنىڭ جٶندەۋ ٸسٸندە جەمقورلىق ايىبىمەن 15 جىلعا سوتتالعان بولاتىن. يساكوۆتىڭ دٷنيە-مٷلكٸ تەركٸلەنٸپ, ساياساتكەر ديپلوماتييالىق دەرەجەسٸنەن جەنە بارلىق مەملەكەتتٸك ماراپاتتارىنان ايىرىلعان ەدٸ.
ساپار يساكوۆ 2017-18 جىلدارى – المازبەك اتامباەۆتىڭ تۇسىندا ەلدٸڭ پرەمەرٸ بولدى. ول – اتامباەۆتىڭ جاقىن سەرٸكتەستەرٸنٸڭ بٸرٸ.
كەيٸن بيلٸك اۋىسقان سوڭ پرەزيدەنتتٸككە سوورونباي جەەنبەكوۆ كەلٸپ, اتامباەۆتىڭ بٸرنەشە سەرٸكتەسٸنە جەمقورلىق ايىبىمەن ٸس قوزعالعان. تەرگەۋ اكتٸسٸنە ساي, يساكوۆ بٸشكەك جىلۋ ورتالىعىن جٶندەۋ كەزٸندە قىتايلىق تۆەا كومپانيياسىنا "كٶمەكتەسكەن".
