Bishkektiń Pervomaiskii aýdandyq soty Qyrǵyzstannyń burynǵy premer-ministri Sapar Isakovty "astanadaǵy Tarih mýzeiin jóndeý kezinde jáne Sholpan-Atadaǵy ippodrom qurylysy kezinde aqsha jymqyrýǵa qatysy bar" degen aiyptap, 18 jylǵa sottady. Bul týraly Azattyqtyń Qyrǵyz qyzmeti habarlady.
"Osyǵan deiin shyqqan sot úkimindegi jazamen jartylai biriktirip, Isakovqa 18 jyl bas bostandyǵynan aiyrý taǵaiyndalsyn. Jazany óteý 2018 jyldyń 5 maýsymynan eseptelsin" dedi sýdia Marat Sydykov.
Sot Isakovqa 247 mln 650 myń sot (shamamen 3,35 mln dollar) aiyppul saldy.
Sot osy is boiynsha ekinshi aiyptalýshy – prezident ákimshiliginiń azamattyq damý, din jáne etnikalyq saiasat bóliminiń jetekshisi Mira Karybaevaǵa 247 mln som (3,3 mln dollar) aiyppul saldy.
2019 jyly jeltoqsanda eks-premer Sverdlovskii aýdandyq sotynyń úkimimen Bishkektegi jylý elektr ortalyǵynyń jóndeý isinde jemqorlyq aiybymen 15 jylǵa sottalǵan bolatyn. Isakovtyń dúnie-múlki tárkilenip, saiasatker diplomatiialyq dárejesinen jáne barlyq memlekettik marapattarynan aiyrylǵan edi.
Sapar Isakov 2017-18 jyldary – Almazbek Atambaevtyń tusynda eldiń premeri boldy. Ol – Atambaevtyń jaqyn seriktesteriniń biri.
Keiin bilik aýysqan soń prezidenttikke Sooronbai Jeenbekov kelip, Atambaevtyń birneshe seriktesine jemqorlyq aiybymen is qozǵalǵan. Tergeý aktisine sai, Isakov Bishkek jylý ortalyǵyn jóndeý kezinde qytailyq TVEA kompaniiasyna "kómektesken".
