قازاقستان پرەزيدەنتٸ نۇرسۇلتان نازارباەۆ (وڭ جاقتا) پەن قىرعىز رەسپۋبليكاسىنىڭ پرەزيدەنتتٸگٸنە كانديدات ٶمٸربەك بابانوۆ. الماتى, 19 قىركٷيەك 2017 جىل. قازاقستان پرەزيدەنتٸنٸڭ رەسمي سايتىنداعى سۋرەت.
قىرعىزستان ورتالىق سايلاۋ كوميسسيياسى پرەزيدەنتتٸككە كانديدات ٶمٸربەك بابانوۆتىڭ قازاقستان پرەزيدەنتٸ نۇرسۇلتان نازارباەۆپەن كەزدەسكەنٸ بويىنشا شاعىمدى قاناعاتتاندىرۋدان باس تارتتى. بۇل تۋرالى وسك باسپاسٶز قىزمەتٸنە سٸلتەمە جاساعان ازاتتىقتىڭ قىرعىز رەداكتسيياسى حابارلادى.
كوميسسييانىڭ حابارلاۋىنشا, تالقىلاۋ كەزٸندە بابانوۆ ٶزٸنٸڭ ٷگٸت-ناسيحات ماتەريالدارىندا كەزدەسۋدەن تٷسٸرٸلگەن سۋرەتتەرٸن پايدالانباعانى, سوندىقتان زاڭ بۇزباعانى ايتىلعان. بٸراق وسك-نٸڭ كەيبٸر مٷشەلەرٸ باق-تاعى حابارلار ەلدەقايدا كەڭٸنەن تارالاتىندىقتان "كانديدات ول تۋرالى حاباردار بولىپ تٷسٸنۋٸ تيٸس" دەگەن پٸكٸردە.
بٸراق شاعىمدانۋشى, قوعام قايراتكەرٸ تۋرسۋنبەك اكۋن شاعىمدى ۋاقىتىنان كەشٸكتٸرٸپ بەرگەندٸكتەن ونى قاناعاتتاندىرۋدان باس تارتىلعان.
وسك سونىمەن قاتار كانديداتتاردى ٷگٸت-ناسيحات كامپانييالارىندا شەت مەملەكەتتەردٸڭ مەملەكەت جەنە ساياسي قايراتكەرلەرٸن پايدالانۋعا بولمايتىنىن, ولاي بولعان جاعدايدا جازباشا ەسكەرتۋ جاسالىپ, كانديداتتىق تٸركەۋٸنەن ايىرىلاتىنىن ەسكەرتەدٸ.
19 قىركٷيەكتە قازاقستان پرەزيدەنتٸنٸڭ رەسمي سايتى نازارباەۆتىڭ "رەسپۋبليكا - اتا-جۇرت" فراكتسيياسىنىڭ باسشىسى ٶمٸربەك بابانوۆپەن كەزدەسكەنٸ تۋرالى اقپارات جارييالاعان. كەزدەسۋ الماتى قالاسىندا ٶتكەنٸ حابارلانعان. بٸراق كەزدەسۋدٸڭ قاشان ٶتكەنٸ كٶرسەتٸلمەگەن.
كەلەسٸ كٷنٸ قىرعىزستان سىرتقى ٸستەر مينيسترلٸگٸ قازاقستانعا نارازىلىق نوتاسىن جولداعان. رەسمي بٸشكەك مۇنى "قازاقستاننىڭ قىرعىزستاننىڭ ٸشكٸ ٸسٸنە ارالاسۋعا تىرىسۋى" دەپ باعالاعان.
