سولتٷستٸك قازاقستان وبلىسىندا جۇمىرتقا مەن قۇس ەتٸنٸڭ جەتكٸلٸكتٸ قورى بار. ياعني قۇس تۇماۋىنا بايلانىستى ٶنٸمنٸڭ بۇل تٷرلەرٸن قىمباتتاتۋعا نەگٸز جوق, دەپ حابارلايدى "ۇلت اقپارات".
سقو ەكٸمٸ قۇمار اقساقالوۆ ەلەۋمەتتٸك جەلٸدەگٸ پاراقشاسىندا ٶڭٸردە قۇس تۇماۋىنا بايلانىستى اتقارىلىپ جاتقان جۇمىستار جايىندا جازدى. ٶڭٸر باسشىسىنىڭ ايتۋىنشا, قازٸر 7 اۋدانداعى 11 ەلدٸمەكەن كارانتينگە جابىلعان. بۇل تٸزٸمگە تاعى 6 اۋىل قوسىلادى. شۇعىل شتاب جۇمىس ٸستەپ جاتىر. اۋرۋ وشاقتارى تابىلعان اۋماقتاردا دەزينفەكتسييا جاسالۋدا. رەسپۋبليكالىق ارنايى جاساق ٶلگەن قۇستاردى جويۋمەن اينالىسۋدا. ٷي قۇستارىنا ەكپە ەگٸلە باستادى. وبلىسقا 873 مىڭ دوزا وتاندىق ۆاكتسينا بٶلٸندٸ.
«قۇس تۇماۋىنان ٶلگەن ٷي قۇستارىنىڭ يەلەرٸنە اقشالاي ٶتەماقى تٶلەنەدٸ. بۇل جۇمىسپەن ارنايى قۇرىلعان كوميسسييا اينالىسۋدا. سونداي-اق, قۇس شارۋاشىلىعىنداعى جۇمىس ورىندارىن ساقتاپ قالىپ, جۇمىرتقا مەن قۇس ەتٸنٸڭ باعاسىنىڭ ٶسۋٸنە جول بەرمەۋ قاجەت. قۇس فابريكالارىندا جۇمىرتقانىڭ قاجەتتٸ قورى بار», - دەپ جازدى ٶڭٸر باسشىسى قۇمار اقساقالوۆ.
سونداي-اق وبلىس ەكٸمٸ قۇس ٶسٸرۋشٸلەرگە قۇلاققاعىس جاساپ, ٷي قۇستارىن ٶزەن-كٶلدەرگە شىعارماۋعا, قاز-ٷيرەكتەردٸ جابىق جەردە ۇستاۋعا كەڭەس بەردٸ.
