دەنساۋلىق ساقتاۋ مينيسترٸ ەلجان بٸرتانوۆ كوروناۆيرۋس جۇقتىرعان قازاقستان ازاماتتارىمەن بٸر بورتتا بولعان جولاۋشىلار كارانتينگە جاتقىزىلاتىنىن مەلٸم ەتتٸ, دەپ حابارلايدى "ۇلت اقپارات".
«اتالعان ازاماتتار الماتى قالاسىنداعى ينفەكتسييالىق ستاتسيوناردا جاتىر. بۇدان بۇرىن ايتقانىمىزداي, ەلٸمٸزدە كوروناۆيرۋس تٸركەلگەن جاعدايدا ٷكٸمەت جانىنداعى ۆەدومستۆوارالىق كوميسسييا تيٸستٸ ٸس-شارالار جوسپارىن بەكٸتكەن ەدٸ. «ب» جوسپارى بٷگٸن كٷشٸن ەندٸ. بٸرٸنشٸ پاتسيەنت 9 ناۋرىزدا, ەكٸنشٸسٸ 12 ناۋرىزدا كەلگەن. ولاردىڭ كٸم ەكەنٸن جارييالاي المايمىز. بٸر ەر ادام مەن بٸر ەيەل. ەكەۋٸ دە قازاقستانعا ۇشاقپەن ۇشىپ كەلگەن. بورتتا كوروناۆيرۋستى جۇقتىرعاندارمەن بٸرگە بولعانداردىڭ بەرٸ دە كارانتينگە جاتقىزىلادى. ياعني, 9 ناۋرىزدا بٸرگە ۇشقان 73 ادامنىڭ كٸم ەكەنٸ انىقتالدى. ولار باقىلاۋدا. قايدا ەكەنٸن بٸلەمٸز. كارانتينگە جاتقىزۋ شارالارىنا كٸرٸستٸك. ولار اۋرۋ ادامدار ەمەس», - دەدٸ ە. بٸرتانوۆ.
سونىمەن قاتار ول بورتتا ەكٸ قازاقستاندىقپەن ۇشىپ كەلگەن جولاۋشىلاردىڭ تٸزٸمٸ بار ەكەنٸن جەتكٸزدٸ. 12 ناۋرىزدا كەلگەن ۇشاقتاعى 12 ازامات قازٸرگٸ تاڭدا كارانتيندە جاتىر.
ەسكە سالا كەتسەك, بۇعان دەيٸن دەنساۋلىق ساقتاۋ مينيسترٸ ەلجان بٸرتانوۆ قازاقستاننىڭ ەكٸ ازاماتىنان كوروناۆيرۋس ينفەكتسيياسى تابىلعانىن مەلٸم ەتكەن ەدٸ.
