قر ەكولوگييا, گەولوگييا جەنە تابيعي رەسۋستار مينيسترٸ ماعزۇم مىرزاعاليەۆ كوروناۆيرۋس قاۋپٸنە بايلانىستى وقشاۋلاندى, دەپ حابارلايدى قازاقپارات.
«ماعزۇم ماراتۇلى ٶتكەن جۇما كٷنٸ دەنساۋلىق ساقتاۋ مينيسترٸمەن بٸرگە ۇشىپ كەلدٸ. سوندىقتان بايلانىستا بولعان تۇلعا رەتٸندە وقشاۋلاندى. مينيستر تەست تاپسىردى, نەتيجەسٸ تەرٸس. اپتا سوڭىندا تاعى تاپسىراتىن بولادى. دەگەنمەن, ول بارلىق جۇمىس جينالىستارىن, كەلٸسسٶزدەردٸ ونلاين رەجٸمدە ٶتكٸزٸپ جاتىر», - دەدٸ مينيستردٸڭ باسپاسٶز حاتشىسى سامال يبراەۆا.
ەسكە سالساق, دەنساۋلىق ساقتاۋ مينيسترٸ ەلجان بٸرتانوۆ Facebook پاراقشاسىندا كوروناۆيرۋس جۇقتىرعانىن حابارلاعان ەدٸ.
12 ماۋسىمدا قر پرەمەر-مينيسترٸ اسقار مامين جامبىل وبلىسىنا جۇمىس ساپارىمەن بارىپ قايتتى, وندا دەنساۋلىق ساقتاۋ مينيسترٸ ە. بٸرتانوۆ تا بولعان. وسىعان بايلانىستى ٷكٸمەت باسشىسى دا وقشاۋلانۋعا مەجبٷر بولىپ وتىر.
ەرٸپتەستەرٸمەن بٸرگە اسحات ايماعامبەتوۆ پەن اۋىل شارۋاشىلىعى مينيسترٸ ساپارحان وماروۆ وقشاۋلاندى.
