فوتو: inform.kz
قر ەنەرگەتيكا مينيسترٸنٸڭ مٸندەتٸن اتقارۋشى بولات اقشولاقوۆ جاڭا مۇناي ٶڭدەۋ زاۋىتىن سالۋعا قاتىستى قانداي شەشٸم بار ەكەنٸن ايتتى, دەپ حابارلايدى قازاقپارات اگەنتتٸگٸ.
«مۇناي ٶڭدەۋ زاۋىتىنا قاتىستى توقتالساق, بىلتىر شىمكەنت مۇناي ٶڭدەۋ زاۋىتىن كەڭەيتۋ تۋرالى شەشٸم قابىلدادىق. كەزٸندە ول 12 ميلليون تونناعا ەسەپتەلگەن بولاتىن. ياعني, ونىڭ تەك 6 ملن توننا شاماسىنداعى قۋاتى ٸسكە قوسىلعان», - دەدٸ اقشولاقوۆ ورتالىق كوممۋنيكاتسييالار قىزمەتٸندەگٸ باسپاسٶز مەسليحاتىندا.
ونىڭ ايتۋىنشا, زاۋىتتىڭ اۋماعى نەگٸزٸنەن 12 ملن توننا ٶندٸرۋگە ارنالعان.
«بۇل زاۋىتتىڭ قۋاتىن ەكٸ ەسە ارتتىرۋ تۋرالى شەشٸمگە توقتالدىق. شىن مەنٸندە, بٸز شىمكەنت مۇناي ٶڭدەۋ زاۋىتى اۋماعىندا تاعى دا 6 ميلليوندىق مۇناي ٶڭدەۋ زاۋىتىن سالعىمىز كەلەدٸ. ەگەر باسقا بوس اۋماقتا دەربەس سالساق, ول جوبا قىمباتقا تٷسەدٸ. سوندىقتان زاۋىتتى قولدانىستاعى ينفراقۇرىلىمنىڭ اۋماعىندا سالساق, بۇل جوبا جەڭٸلدەۋ بولادى, ٶيتكەنٸ ول جەرگە مۇناي قۇبىرلارى تارتىلعان», - دەدٸ مينيستردٸڭ مٸندەتٸن اتقارۋشى.
ونىڭ سٶزٸنە قاراعاندا, جاڭا ٶندٸرٸستٸ جوبالاۋدان ٸسكە قوسۋعا دەيٸن شامامەن التى جىل ۋاقىت كەرەك.
بۇدان بۇرىن حابارلانعانداي, قازاقستاندا بەنزين مەن ديزەل وتىنىنىڭ باعاسى ٶسەدٸ.
