فوتو: Freepik
قازاقستاندا قىزىلشا جۇقتىرعاندار سانى ارتىپ بارادى: جىل باسىنان بەرٸ 11 مىڭ ادام تٸركەلدٸ. دەنساۋلىق ساقتاۋ ۆيتسە-مينيسترٸ تيمۋر سۇلتانعازيەۆتٸڭ ايتۋىنشا, اۋرۋعا شالدىققانداردىڭ باسىم بٶلٸگٸ - تٷرلٸ سەبەپتەرمەن ەكپە الماعان 14 جاسقا دەيٸنگٸ بالالار, - دەپ حابارلايدى Tengrinews.kz سايتى.
شەنەۋنٸكتٸڭ ايتۋىنشا, ەكپە الماعان بالالار نە مەديتسينالىق تۇرعىدان قارسى كٶرسەتٸلٸم تۋرالى قاعاز العاندار, نە اتا-انالارى ينتەرنەتتەگٸ جالعان اقپاراتتىڭ ەسەرٸنەن ەكپەدەن باس تارتقان.
"جاعدايدى اۋىزدىقتاۋ ٷشٸن باس مەملەكەتتٸك سانيتارييا دەرٸگەرٸ 6 ايدان 11 ايعا دەيٸنگٸ بالالارعا قوسىمشا ۆاكتسيناتسييا جٷرگٸزۋ تۋرالى شەشٸم قابىلدادى. بۇدان باسقا, قوسىمشا ۆاكتسيناتسييا 2 جاستان 5 جاسقا دەيٸنگٸ بالالار اراسىندا جٷرگٸزٸلەدٸ", - دەدٸ سۇلتانعازيەۆ سەناتتا ٶتكەن بريفينگتە.
ۆيتسە-مينيستردٸڭ سٶزٸنشە, اۋرۋشاڭدىق جاعدايى شىمكەنت, الماتى قالالارىندا, سونداي-اق الماتى جەنە جامبىل وبلىستارىندا ٶرشٸپ تۇر.
