قازاقستاندا 27 تامىز كٷنٸ كوروناۆيرۋس جۇقتىرعان 157 كٸسٸنٸڭ ٶلٸمٸ تٸركەلدٸ. بۇل تۋرالى دەنساۋلىق ساقتاۋ مينيسترلٸگٸ حابارلادى.
كوروناۆيرۋس ينفەكتسيياسى قايتىس بولعانداردىڭ 135-ٸنەن انىقتالعان (كۆي+). قالعان 22 ادامدا پتر تەستٸ تەرٸس نەتيجە كٶرسەتكەن, ولارعا اۋرۋ بەلگٸلەرٸنە قاراي "كوۆيدتەكتەس پنەۆمونييا" (كۆي-) دياگنوزى قويىلعان.
كۆي+ ساناتى بويىنشا, الماتى قالاسىندا 33 ادام, قاراعاندى وبلىسىندا 22, شىمكەنتتە 16, ماڭعىستاۋ وبلىسىندا 12, اتىراۋ وبلىسىندا 11, نۇر-سۇلتاندا 9 ادام كٶز جۇمعان.
رەسمي دەرەك بويىنشا, ٸندەت باستالعالى ەلدە 779 927 ادامنىڭ اناليزٸنەن كوروناۆيرۋس ينفەكتسيياسى انىقتالسا, سونىڭ 9118-ٸ قايتىس بولعان. بٸراق بيلٸك بۇعان كوروناۆيرۋس جۇقتىرعانى راستالعان 2633 كٸسٸنٸڭ ٶلٸمٸن قوسپاي وتىر. دەنساۋلىق ساقتاۋ مينيسترلٸگٸنٸڭ مەلٸمدەۋٸنشە, بۇل ادامداردا كوروناۆيرۋس "جاناما ەسەر" بولعان. بٸراق مينيسترلٸكتٸڭ ٶزٸ بۇل ازاماتتاردىڭ كٶبٸ قاناينالىم جٷيەسٸ اۋرۋلارىنان قايتىس بولعانىن ايتادى. ال ددسۇ مۇنداي اۋرۋلاردىڭ كوروناۆيرۋسپەن بايلانىسى بارىن ايتادى.
ٷكٸمەت "كوۆيدتەكتەس پنەۆمونييا" ەسەبٸن بىلتىر 1 تامىزدا عانا باستادى. سودان بەرٸ پنەۆمونييانىڭ بۇل تٷرٸمەن 69 630 ادام تٸركەلٸپ, ونىڭ 4386-سى كٶز جۇمعان.
ەكٸ ەسەپتٸ قوسا العاندا, قازاقستاندا كەيٸنگٸ ايدا كٷن سايىن 6-8 مىڭ ناۋقاس تٸركەلٸپ كەلەدٸ. دەنساۋلىق ساقتاۋ مينيسترلٸگٸ مۇنى جۇقپالىعى جوعارى "دەلتا" ۆاريانتىمەن بايلانىستىرادى. العاش رەت ٷندٸستاندا انىقتالعان بۇل ۆاريانت قازاقستاندا ماۋسىمنىڭ سوڭىندا تٸركەلگەن.
دەنساۋلىق ساقتاۋ مينيسترلٸگٸنٸڭ مەلٸمەتٸنشە, دەل قازٸر كوروناۆيرۋستان 115 مىڭنان استام ادام ەمدەلٸپ جاتىر. ونىڭ 25,7 مىڭى ەمدٸ ستاتسيوناردى الىپ وتىر. 1796 ناۋقاستىڭ جاعدايى اۋىر, 493 ناۋقاستىڭ جاعدايى ٶتە اۋىر, 237 ناۋقاس ٶكپەنٸ جەلدەتۋ اپپاراتىنا قوسىلعان.
كوروناۆيرۋستىڭ "دەلتا" ۆاريانتى جۇقپالىعى جوعارى بولۋمەن قاتار ادامدى اۋىر حالگە جىلدام تٷسٸرەتٸنٸمەن دە ەرەكشەلەنەدٸ. بٸراق زەرتتەۋلەر قازٸرگٸ ۆاكتسينالاردىڭ بۇل ۆاريانتتان دا قورعايتىنىن كٶرسەتٸپ وتىر.
ۆاكتسينالاۋ ناۋقانىن 1 اقپاندا باستاعان قازاقستاندا كوروناۆيرۋس ينفەكتسيياسىنا قارسى ۆاكتسينانىڭ 1-شٸ كومپونەنتٸن - 6 592 369, 2-شٸ كومپونەنتٸن 5 317 112 ادام سالدىرعان.
19 ميلليون حالقى بار قازاقستاندا ٷكٸمەت كەمەلەتكە تولعان 10 ميلليون ادامعا ۆاكتسينا سالۋدى كٶزدەپ وتىر.
