Qazaqstanda 27 tamyz kúni koronavirýs juqtyrǵan 157 kisiniń ólimi tirkeldi. Bul týraly densaýlyq saqtaý ministrligi habarlady.
Koronavirýs infektsiiasy qaitys bolǵandardyń 135-inen anyqtalǵan (KVI+). Qalǵan 22 adamda PTR testi teris nátije kórsetken, olarǵa aýrý belgilerine qarai "kovidtektes pnevmoniia" (KVI-) diagnozy qoiylǵan.
KVI+ sanaty boiynsha, Almaty qalasynda 33 adam, Qaraǵandy oblysynda 22, Shymkentte 16, Mańǵystaý oblysynda 12, Atyraý oblysynda 11, Nur-Sultanda 9 adam kóz jumǵan.
Resmi derek boiynsha, indet bastalǵaly elde 779 927 adamnyń analizinen koronavirýs infektsiiasy anyqtalsa, sonyń 9118-i qaitys bolǵan. Biraq bilik buǵan koronavirýs juqtyrǵany rastalǵan 2633 kisiniń ólimin qospai otyr. Densaýlyq saqtaý ministrliginiń málimdeýinshe, bul adamdarda koronavirýs "janama áser" bolǵan. Biraq ministrliktiń ózi bul azamattardyń kóbi qanainalym júiesi aýrýlarynan qaitys bolǵanyn aitady. Al DDSU mundai aýrýlardyń koronavirýspen bailanysy baryn aitady.
Úkimet "kovidtektes pnevmoniia" esebin byltyr 1 tamyzda ǵana bastady. Sodan beri pnevmoniianyń bul túrimen 69 630 adam tirkelip, onyń 4386-sy kóz jumǵan.
Eki esepti qosa alǵanda, Qazaqstanda keiingi aida kún saiyn 6-8 myń naýqas tirkelip keledi. Densaýlyq saqtaý ministrligi muny juqpalyǵy joǵary "delta" variantymen bailanystyrady. Alǵash ret Úndistanda anyqtalǵan bul variant Qazaqstanda maýsymnyń sońynda tirkelgen.
Densaýlyq saqtaý ministrliginiń málimetinshe, dál qazir koronavirýstan 115 myńnan astam adam emdelip jatyr. Onyń 25,7 myńy emdi statsionardy alyp otyr. 1796 naýqastyń jaǵdaiy aýyr, 493 naýqastyń jaǵdaiy óte aýyr, 237 naýqas ókpeni jeldetý apparatyna qosylǵan.
Koronavirýstyń "delta" varianty juqpalyǵy joǵary bolýmen qatar adamdy aýyr halge jyldam túsiretinimen de erekshelenedi. Biraq zertteýler qazirgi vaktsinalardyń bul varianttan da qorǵaitynyn kórsetip otyr.
Vaktsinalaý naýqanyn 1 aqpanda bastaǵan Qazaqstanda koronavirýs infektsiiasyna qarsy vaktsinanyń 1-shi komponentin - 6 592 369, 2-shi komponentin 5 317 112 adam saldyrǵan.
19 million halqy bar Qazaqstanda úkimet kámeletke tolǵan 10 million adamǵa vaktsina salýdy kózdep otyr.
