بٷگٸن قازاقستاندا جالپىۇلتتىق حالىق ساناعى باستالدى, دەپ حابارلايدى "ۇلت اقپارات".
تەۋەلسٸزدٸك العان 30 جىل ٸشٸندە حالىق ساناعى ٷشٸنشٸ رەت ٶتكٸزٸلٸپ جاتىر. بيىلعى ساناقتىڭ ەرەكشەلٸگٸ – شارادا العاش رەت تسيفرلىق تەحنولوگييالار قولدانىلادى.
"1 قىركٷيەكتەن 15 قازانعا دەيٸنگٸ ارالىقتا sanaq.gov.kz سايتىندا ونلاين رەجيمدە حالىق ساناعىنان ٶتۋگە بولادى. سايت 24 ساعات بويى جۇمىس ٸستەيدٸ", - دەپ حابارلادى ۇلتتىق ستاتيستيكا بيۋروسىنىڭ باسشىسى نۇربولات ايداپكەلوۆ.
ونلاين رەجيمٸندە ساناقتان ٶتپەگەن ازاماتتار 1-30 قازان ارالىعىندا ينتەرۆيۋەرلەردٸڭ ساۋالدارىنا جاۋاپ بەرە الادى. بۇل جاعدايدا بارلىق سانيتارلىق تالاپ ساقتالادى. سونداي-اق ينتەرۆيۋەرلەر ساناق كەزٸندە ەلەكتروندى پلانشەت پايدالانادى.
بيىلعى حالىق ساناعىندا 91 سۇراق بار. الايدا بۇل ازاماتتار ساۋالدىڭ بارلىعىنا جاۋاپ بەرەدٸ دەگەندٸ بٸلدٸرمەيدٸ. سەبەبٸ ساناق پاراقتارىندا شەتەلگە كەتكەن نەمەسە ەلگە كەلگەن ادامدارعا, تەك قانا ەيەلدەرگە قويىلاتىن سۇراقتار بار. سونداي-اق ٷيدٸڭ جاعدايىنا قاتىستى ساۋالدارعا تەك ٷيدٸڭ يەسٸ جاۋاپ بەرەدٸ.
بيىل ساناقتا "شەتەلگە كٶشۋ جوسپارىڭىزدا بار ما?" دەگەن سۇراق قوسىلدى. ول حالىقارالىق ۇيىمداردىڭ تالابى بويىنشا ەلەمدەگٸ كٶشٸ-قون پروتسەستەرٸن بٸلۋ ٷشٸن ەنگٸزٸلگەن. بۇدان بٶلەك جۇمىسپەن قامتۋ, نەكە, تٸلدەردٸ مەڭگەرۋ, تابىس كٶزدەرٸ, مٷگەدەكتٸك, دٸني قٶزقاراسى تۋرالى سۇراقتار بار.
ورتاشا ەسەپپەن ساناق ساۋالدارىنا جاۋاپ بەرۋگە 20-25 مينۋت قاجەت, دەپ حابارلادى ۇلتتىق ستاتيستيكا بيۋروسىنىڭ باسپاسٶز قىزمەتٸ.
حالىق ساناعىنان ونلاين ٶتۋ ٷشٸن نە ٸستەۋ كەرەك ەكەنٸن ۆيدەودان كٶرۋگە بولادى.
