Búgin Qazaqstanda jalpyulttyq halyq sanaǵy bastaldy, dep habarlaidy "Ult aqparat".
Táýelsizdik alǵan 30 jyl ishinde halyq sanaǵy úshinshi ret ótkizilip jatyr. Biylǵy sanaqtyń ereksheligi – sharada alǵash ret tsifrlyq tehnologiialar qoldanylady.
"1 qyrkúiekten 15 qazanǵa deiingi aralyqta sanaq.gov.kz saitynda onlain rejimde halyq sanaǵynan ótýge bolady. Sait 24 saǵat boiy jumys isteidi", - dep habarlady ulttyq statistika biýrosynyń basshysy Nurbolat Aidapkelov.
Onlain rejiminde sanaqtan ótpegen azamattar 1-30 qazan aralyǵynda interviýerlerdiń saýaldaryna jaýap bere alady. Bul jaǵdaida barlyq sanitarlyq talap saqtalady. Sondai-aq interviýerler sanaq kezinde elektrondy planshet paidalanady.
Biylǵy halyq sanaǵynda 91 suraq bar. Alaida bul azamattar saýaldyń barlyǵyna jaýap beredi degendi bildirmeidi. Sebebi sanaq paraqtarynda shetelge ketken nemese elge kelgen adamdarǵa, tek qana áielderge qoiylatyn suraqtar bar. Sondai-aq úidiń jaǵdaiyna qatysty saýaldarǵa tek úidiń iesi jaýap beredi.
Biyl sanaqta "Shetelge kóshý josparyńyzda bar ma?" degen suraq qosyldy. Ol halyqaralyq uiymdardyń talaby boiynsha álemdegi kóshi-qon protsesterin bilý úshin engizilgen. Budan bólek jumyspen qamtý, neke, tilderdi meńgerý, tabys kózderi, múgedektik, dini qózqarasy týraly suraqtar bar.
Ortasha eseppen sanaq saýaldaryna jaýap berýge 20-25 minýt qajet, dep habarlady ulttyq statistika biýrosynyń baspasóz qyzmeti.
Halyq sanaǵynan onlain ótý úshin ne isteý kerek ekenin videodan kórýge bolady.
