ساۋدا جەنە ينتەگراتسييا مينيسترٸ باقىت سۇلتانوۆ قازاقستاننان شەتەلگە بال ەكسپورتتاۋعا قولداۋ جاسالىپ وتىرعانىن ايتتى, دەپ حابارلايدى قازاقپارات.
«ەكسپورتتىق قارجىلاندىرۋ بويىنشا پايىزدىق ستاۆكانى سۋبسيدييالاۋ تۇرعىسىندا تاعى بٸر قادامعا باستاماشىلىق ەتتٸك. بۇل ٶز كەزەگٸندە سىرتقى نارىقتارعا جوعارى تەحنولوگييالىق ٶنٸمدٸ جەتكٸزۋ بويىنشا شارتتارعا قولداۋ جاسايدى. قولداۋدىڭ وسى تٷرٸن كٷتٸپ وتىرعان كەسٸپورىندار تٸزٸمٸ بار, ولار جىل سايىن 300 ملرد تەڭگەدەن استام سوماعا وسىنداي ٶنٸمدٸ ەكسپورتتاۋعا دايىن», - دەدٸ مينيستر ونلاين رەجيمدە حالىق الدىندا ەسەپ بەرۋ كەزٸندە.
وسى ورايدا ول ەكسپورتتاۋشىلارمەن تەۋلٸك بويى بايلانىستا بولۋ تەتٸكتەرٸ ەسكەرٸلگەنٸن جەتكٸزدٸ.
«بيىل لەپسٸدەن بٸرٸككەن اراب ەمٸرلٸگٸنە 10 توننا بال جەتكٸزۋگە كٶمەكتەستٸك. سونىمەن قاتار, 22 توننا ەت ٶنٸمٸنە اۆياەكسپرەسس ۇيىمداستىردىق. ٶتكەن جىلى العاش رەت بٸزدٸڭ اككۋمۋلياتورلاردى يتاليياعا ەكسپورتتاۋ ٸسكە اسىرىلدى. كامبودجاعا ۇشۋ-ناۆيگاتسييالىق ترەناجەرلەرٸن جٶنەلتتٸك. بۇل ٶز كەزەگٸندە ەكسپورتتاۋشىلار ٷشٸن مەملەكەتتٸك قولداۋ شارالارى ەلەۋلٸ ەكەنٸن بايقاتىپ وتىر», - دەدٸ سۇلتانوۆ.
