بيىل قوعامدىق-گۋمانيتارلىق باعىتتاعى 6 مىڭ تەرمينگە ساراپتاما جاسالادى. بۇل جايىندا سەنات دەپۋتاتتارىنىڭ ساۋالىنا بەرٸلگەن قر پرەمەر-مينيسترٸنٸڭ ورىنباسارى ەرالى توعجانوۆتىڭ جاۋابىندا ايتىلعان, دەپ حابارلايدى قازاقپارات.
«قازاق تٸلٸنٸڭ تەرمينولوگييالىق بازاسىن جەتٸلدٸرۋ بويىنشا جۇمىستار جٷرگٸزٸلٸپ جاتىر. جالپى 1971 جىلدان بەرٸ 31 611 تەرمينگە لينگۆيستيكالىق ساراپتاما جاسالعان. بيىل قوعامدىق-گۋمانيتارلىق باعىتتاعى 6 مىڭ تەرمينگە ساراپتاما جاساۋ جوسپارلانۋدا. جاڭا تەرميندەردٸ بٸرٸزدەندٸرۋ ماقساتىندا «Termincom.kz» قىزمەت ەتەدٸ. ماقۇلداۋعا ۇسىنىلعان سالالىق تەرميندەردٸ تەك كوميسسييا مٷشەلەرٸ عانا ەمەس, سالا ماماندارى مەن جالپى جۇرتشىلىق تالقىلايدى», - دەپ اتاپ ٶتەدٸ ۆيتسە-پرەمەر.
ەرالى توعجانوۆ قازاق تٸلٸن ۇلتارالىق قاتىناستار تٸلٸنە اينالدىرۋ ماقساتىندا جىل سايىن وقىتۋ كۋرستارى مەن تٷرلٸ بايقاۋلار, ىنتالاندىرۋ ٸس-شارالارى ۇيىمداستىرىلىپ كەلە جاتقانىن ايتادى.
«سونىمەن قاتار قازاق تٸلٸ ۇلتتىق كورپۋسىنىڭ مەتٸندٸك بازاسىن قۇرۋ جۇمىسى قولعا الىندى. 2021 جىلى پۋبليتسيستيكالىق مەتٸندەردەردٸڭ 2 ملن بٸرلٸگٸنە تالداۋ جاسالىپ, qazcorpora.kz سايتىنا ورنالاستىرىلدى», - دەلٸنگەن ٷكٸمەت باسشىسىنىڭ ورىنباسارىنىڭ جاۋابىندا.
