بٷگٸن تەڭٸز شەكاراشىلارى كاسپيي تەڭٸزٸن شولىپ جٷرٸپ 44˚25′ سولتٷستٸك ەندٸك پەن 50˚00′ شىعىس بويلىعىنىڭ اۋماعىندا قوس «ياماحا» موتورلى «بايدا» تيپتەس جىلدام جٷزەتٸن شاعىن جٷزۋ قۇرالىن كەزٸكتٸردٸ, دەپ حابارلايدى قر ۇقك باسپاسٶز قىزمەتٸ.
قاراڭعىنى قاق جارىپ كەنەتتەن پايدا بولعان تەڭٸز شەكاراشىلارىنىڭ كاتەرٸن بايقاپ قالعان «بايدا» قاشۋعا بەت العان كەزدە, ونى توقتاتۋ ٷشٸن شەكاراشىلاردىڭ ەسكەرتۋ رەتٸندە اسپانعا وق اتۋىنا تۋرا كەلدٸ. شەكارا بۇزۋشىلار بۇدان ەرٸ تەۋەكەلگە بەل بۋۋعا دەتتەرٸ شىداماي, زەكٸر تاستاپ, قولدارىن كٶتەردٸ. قايىقتا وتىرعان 4 ادامنىڭ بارلىعى دا رەسەي ازاماتتارى ەكەن. ەكەۋٸ 52 جاستا, بٸرەۋٸ 36 جاستا, ال بٸرەۋٸ نەبەرٸ 20 جاستا. قايىقتان 200 ليتر اۋىز سۋ, قوسىمشا باللونىمەن گاز پليتا, ازىق-تٷلٸك پەن قوسالقى بٶلشەكتەر تابىلعانىنا قاراعاندا, بۇلار تەڭٸزدە ۇزاعىراق جٷرەمٸز دەپ ٷمٸتتەنگەن بولۋى كەرەك.
تەرگەۋ امالدارى جٷرگٸزٸلۋدە.
