الماتىدا «Car city» بازارىنا رەيد جٷرگٸزگەن پوليتسەيلەر 5 قىلمىسكەردٸ قولعا تٷسٸردٸ, دەپ حابارلايدى قازاقپارات تٸلشٸسٸ.
پوليتسەيلەر ٶتكەن سەنبٸدە اۆتوبٶلشەك بازارىندا كەزەكتٸ تەكسەرٸس جٷرگٸزدٸ. شاراعا 600-دەن اسا ٸشكٸ ٸستەر قىزمەتكەرٸ جۇمىلدىرىلدى. 5 جەدەل توبى ساۋدا نٷكتەلەرٸنەن بٶلەك تەحنيكالىق قىزمەت كٶرسەتۋ ورىندارىن دا تەكسەرگەن.
«ۋچاسكەلٸك ينسپەكتور ٸزٸن سۋىتپاي مٷلٸك ۇرلاۋ قىلمىسىن ەشكەرەلەدٸ. قىلمىس جاساعان 1994 جىلى تۋعان ك. ەسٸمدٸ ازامات بۇعان دەيٸن بٸرنەشە رەت سوتتالعان. بۇدان باسقا 149 ادام ەكٸمشٸلٸك جاۋاپكەرشٸلٸككە تارتىلدى. سونىمەن قاتار 126 ادام اتى-جٶنٸن انىقتاۋ ماقساتىندا ٸشكٸ ٸستەر ورگانىنا جەتكٸزٸلدٸ. ٶزبەكستاندىق 10 ازاماتتىڭ ەلدە ميگراتسييا زاڭىن بۇزىپ جٷرگەنٸ انىقتالدى. رەيد بارىسىندا اتا-اناسىنان جىراقتا جٷرگەن, قازاقستاننىڭ باسقا ٶڭٸرلەرٸنەن كەلگەن 3 جاسٶسپٸرٸم ۇستالدى. بۇل بالالار كەمەلەتتٸك جاسقا تولماعانداردىڭ ۋاقىتشا بەيٸمدەۋ ورتالىعىنا ورنالاستىرىلدى», - دەدٸ الماتى ٸٸد رەسمي ٶكٸلٸ سالتانات ەزٸربەك.
تەرتٸپ ساقشىلارىنىڭ ايتۋىنشا, مۇنداي تەكسەرۋلەر الداعى ۋاقىتتى تۇراقتى تٷردە ٶتكٸزٸلٸپ تۇرماق. ونداعى ماقسات - قالاداعى قىلمىستىق احۋالدى تٷزەپ, زاڭ تالاپتارىن بۇزعانداردى ۇستاۋ. بٸرەۋدٸڭ مٷلكٸن ۇرلاعاندار, ۇرلانعان زاتتاردى ساتۋمەن اينالىسقانداردى جازاعا تارتىپ, زاڭسىز ميگراتسييا كانالدارىن انىقتاۋ بولىپ تابىلادى.
