ٸٸ دٷنيەجٷزٸلٸك سوعىس كەزٸندە گەرمانيياداعى كونتسلاگەرلەردە قازا بولعان 927 وتانداسىمىزدىڭ تٸزٸمٸ تابىلدى. بٷگٸندە ولاردىڭ تۋىستارىن ٸزدەستٸرۋ جۇمىسى جٷرٸپ جاتىر. بۇل تۋرالى قر قورعانىس مينيسترٸنٸڭ ورىنباسارى تيمۋر داندىباەۆ مەلٸم ەتتٸ, دەپ حابارلايدى قازاقپارات.
«ۆوزۆراششەنيە يمەني» حالىقارالىق پاتريوتتىق ۇيىمى بٸزگە سوعىس كەزٸندە گەرمانيياداعى كونتسلاگەرلەردە قازا تاپقان 927 قازاقستاندىق جاۋىنگەردٸڭ تٸزٸمٸن بەردٸ. قازٸرگٸ ۋاقىتتا قازا تاپقانداردىڭ تۋىستارىن انىقتاۋ بويىنشا جۇمىستار جٷرٸپ جاتىر. سونداي-اق, بٸزدٸڭ مينيسترلٸك ٶكٸلدەرٸ بيىل 8 مامىردا «پلاتسدارم» قوعامدىق ۇيىمىنىڭ شاقىرۋىمەن ۋكرايناعا بارىپ, سلاۆيانسك ٷشٸن شايقاستا قازا تاپقان 99 جاۋىنگەردٸڭ, ونىڭ ٸشٸندە جەرلەسٸمٸز - لەيتەنانت ٷكٸباي بازاربايدىڭ سٷيەكتەرٸن قايتا جەرلەۋ رەسٸمٸنە قاتىستى. ودان بٶلەك, قازٸرگٸ ۋاقىتتا رەسەيلٸك ٸزدەۋ توبى بٸزدٸڭ 12 جەرلەسٸمٸزدٸڭ دەنە قالدىقتارىنا ساراپتاما جٷرگٸزۋدە, كەيٸن ولار بٸزگە بەرٸلەدٸ», - دەدٸ تيمۋر داندىباەۆ.
بۇعان دەيٸن قر قورعانىس مينيسترٸنٸڭ ورىنباسارى ٸٸ دٷنيەجٷزٸلٸك سوعىستا حابار-وشارسىز كەتكەن 7 وتانداسىمىزدىڭ مەيٸتٸ تابىلعانىن ايتتى.
ونىڭ مەلٸمدەۋٸنشە, جوعالعانداردىڭ اتى-جٶندەرٸ انىقتالىپ, ەلگە جەتكٸزٸلگەن.
