II Dúniejúzilik soǵys kezinde Germaniiadaǵy kontslagerlerde qaza bolǵan 927 otandasymyzdyń tizimi tabyldy. Búginde olardyń týystaryn izdestirý jumysy júrip jatyr. Bul týraly QR Qorǵanys ministriniń orynbasary Timýr Dandybaev málim etti, dep habarlaidy QazAqparat.
«Vozvrashenie imeni» halyqaralyq patriottyq uiymy bizge soǵys kezinde Germaniiadaǵy kontslagerlerde qaza tapqan 927 qazaqstandyq jaýyngerdiń tizimin berdi. Qazirgi ýaqytta qaza tapqandardyń týystaryn anyqtaý boiynsha jumystar júrip jatyr. Sondai-aq, bizdiń ministrlik ókilderi biyl 8 mamyrda «Platsdarm» qoǵamdyq uiymynyń shaqyrýymen Ýkrainaǵa baryp, Slaviansk úshin shaiqasta qaza tapqan 99 jaýyngerdiń, onyń ishinde jerlesimiz - leitenant Úkibai Bazarbaidyń súiekterin qaita jerleý rásimine qatysty. Odan bólek, qazirgi ýaqytta reseilik izdeý toby bizdiń 12 jerlesimizdiń dene qaldyqtaryna saraptama júrgizýde, keiin olar bizge beriledi», - dedi Timýr Dandybaev.
Buǵan deiin QR Qorǵanys ministriniń orynbasary II Dúniejúzilik soǵysta habar-osharsyz ketken 7 otandasymyzdyń máiiti tabylǵanyn aitty.
Onyń málimdeýinshe, joǵalǵandardyń aty-jónderi anyqtalyp, elge jetkizilgen.
