بٷگٸن UEFA ەۋروپا ليگاسى 2020/2021 جىلعى كەزەڭٸنٸڭ العاشقى ٸرٸكتەۋ ساتىسىندا قازاقستاندىق «قايرات» پەن «ورداباسى» كلۋبتارى قارسىلاستارىن قابىلدادى, دەپ حابارلايدى "ۇلت اقپارات".
ايتا كەتەرلٸگٸ, بيىل جارىستى جالعاستىراتىن كوماندا نەبەرٸ بٸر عانا ويىن نەتيجەسٸمەن انىقتالادى. بۇل - UEFA تاراپىنان كوروناۆيرۋس ينفەكتسيياسى جاعدايىنا بايلانىستى قاۋٸپسٸزدٸك شاراسى رەتٸندە قابىلدانعان شەشٸم.
الماتىدا «قايرات» ارمەنييانىڭ «نوا» كومانداسىمەن كەزدەستٸ. «نوا» كلۋبىنىڭ قۇرىلعانىنا بار-جوعى ٷش جىل تولعان. ەۋروكۋبوك ويىندارىندا العاش رەت باق سىناپ وتىر. تەجٸريبەسٸ ازدىعىنا قاراماستان, ارمەنييالىق كلۋب الاڭ يەلەرٸنە لايىقتى قارسىلىق كٶرسەتتٸ.
ەسەپتٸ «نوا» كومانداسى 8-مينۋتتا اشتى. ەرٸپتەسٸ پاۆەل دەوبالدتىڭ بەرگەن پاسىن كيريلل بور گولعا اينالدىرىپ كەتتٸ. وعان «قايرات» ساپىنان گٷلجٸگٸت ەلٸقۇلوۆ 12-مينۋتتا بٸر گولمەن جاۋاپ قايىردى. ال 35-مينۋتتا الماتىلىق كلۋب قاتارىنان ۆاگنەر لاۆ ەسەپتٸ ٷستەمەلەي تٷسسە, ول 70-مينۋتتا تاعى بٸر گولدىڭ اۆتورى اتاندى. قورىتىندى ەسەپتٸ 90-مينۋتتا الماتىلىق شابۋىلشى ادەرينسولا ەسەولا بەلگٸلەدٸ. وسىلايشا «قايرات» جارىستىڭ كەلەسٸ ساتىسىنا جولداما الدى.
ال شىمكەنتتە جەرگٸلٸكتٸ «ورداباسى» رۋمىنييانىڭ «بوتوشاني» كومانداسىنا 1:2 ەسەبٸمەن ەسە جٸبەردٸ. ويىننىڭ 25-مينۋتىندا رۋمىنييالىق كلۋبتان مارسەل حولتسمانن ەسەپ اشتى. ال شىمكەنتتٸك ماي ماحلانگۋ 31-مينۋتتا تارازى باسىن تەڭەستٸردٸ. «بوتوشاني» ساپىنان 33-مينۋتتا ماركو دۋگاندجيچ ويىننىڭ نٷكتەسٸن قويدى. ايتا كەتەرلٸگٸ, اتالعان كەزدەسۋدە «ورداباسى» ساپىنان ابدۋللاي دياكاتە پەنالتي سوعا العان جوق.
ەندٸ جارىستىڭ ەكٸنشٸ ساتىسىنىڭ جەرەبەسٸ 31 تامىزدا تارتىلادى. جارىستىڭ بۇل كەزەڭٸندە «قايراتتان» ٶزگە بٸزدٸڭ ەلٸمٸزدٸڭ اتىنان ەلوردالىق «استانا» مەن قىزىلوردانىڭ «قايسار» كوماندالارى قاتىسادى.
