Búgin UEFA Eýropa ligasy 2020/2021 jylǵy kezeńiniń alǵashqy irikteý satysynda qazaqstandyq «Qairat» pen «Ordabasy» klýbtary qarsylastaryn qabyldady, dep habarlaidy "Ult aqparat".
Aita keterligi, biyl jarysty jalǵastyratyn komanda nebári bir ǵana oiyn nátijesimen anyqtalady. Bul - UEFA tarapynan koronavirýs infektsiiasy jaǵdaiyna bailanysty qaýipsizdik sharasy retinde qabyldanǵan sheshim.
Almatyda «Qairat» Armeniianyń «Noa» komandasymen kezdesti. «Noa» klýbynyń qurylǵanyna bar-joǵy úsh jyl tolǵan. Eýrokýbok oiyndarynda alǵash ret baq synap otyr. Tájiribesi azdyǵyna qaramastan, armeniialyq klýb alań ielerine laiyqty qarsylyq kórsetti.
Esepti «Noa» komandasy 8-minýtta ashty. Áriptesi Pavel Deobaldtyń bergen pasyn Kirill Bor golǵa ainaldyryp ketti. Oǵan «Qairat» sapynan Gúljigit Áliqulov 12-minýtta bir golmen jaýap qaiyrdy. Al 35-minýtta almatylyq klýb qatarynan Vagner Lav esepti ústemelei tússe, ol 70-minýtta taǵy bir goldyń avtory atandy. Qorytyndy esepti 90-minýtta almatylyq shabýylshy Aderinsola Eseola belgiledi. Osylaisha «Qairat» jarystyń kelesi satysyna joldama aldy.
Al Shymkentte jergilikti «Ordabasy» Rýmyniianyń «Botoshani» komandasyna 1:2 esebimen ese jiberdi. Oiynnyń 25-minýtynda rýmyniialyq klýbtan Marsel Holtsmann esep ashty. Al shymkenttik Mai Mahlangý 31-minýtta tarazy basyn teńestirdi. «Botoshani» sapynan 33-minýtta Marko Dýgandjich oiynnyń núktesin qoidy. Aita keterligi, atalǵan kezdesýde «Ordabasy» sapynan Abdýllai Diakate penalti soǵa alǵan joq.
Endi jarystyń ekinshi satysynyń jerebesi 31 tamyzda tartylady. Jarystyń bul kezeńinde «Qairattan» ózge bizdiń elimizdiń atynan elordalyq «Astana» men Qyzylordanyń «Qaisar» komandalary qatysady.
