بٷگٸن UEFA ەۋروپا ليگاسى 2020/2021 جىلعى كەزەڭٸنٸڭ العاشقى ٸرٸكتەۋ ساتىسىندا الماتىنىڭ «قايراتى» ارمەنييانىڭ «نوا» كومانداسىن قابىلدايدى, دەپ حابارلايدى "ۇلت اقپارات".
ارمەنييالىق كلۋبتىڭ قۇرىلعانىنا بار-جوعى ٷش جىل عانا تولدى. العاشقىدا كوماندا «ارتساح» دەپ اتالعان بولاتىن. 2019 جىلى كلۋبتىڭ اتى «نوا» بولىپ ٶزگەردٸ. كومانداعا مولداۆييالىق يگور پيكۋششاك پەن ۆاديم بورەتس سىندى باپكەرلەر جەتەكشٸلٸك ەتتٸ. اتالعان كلۋب بىلتىر ٶز ەلٸنٸڭ چەمپيوناتىندا كٷمٸس جٷلدەگەر اتانىپ, ارمەنييا كۋبوگىن يەلەندٸ. كوماندا ەل استاناسى – ەرەۆان قالاسىنىڭ اتىنان سىنعا تٷسەدٸ. ٶز الاڭىنداعى ويىندى «الاشكەرت» ستاديونىندا قابىلدايدى.
كوماندا قۇرامىندا ارمەنييالىق ويىنشىلارمەن قاتار لاتۆييا, رەسەي, گۆينەيا-بيساۋ, كولۋمبييا, ليتۆا, ۋكراينا, يتالييا, مولداۆييا, پورتۋگالييا ەلدەرٸنەن كەلگەن فۋتبولشىلار بار. سولاردىڭ بٸرٸ – كولۋمبييالىق جوردي مونروي كولۋمبييادا دٷنيەگە كەلگەن, ونىڭ اناسىنىڭ ۇلتى – ارميان. سوندىقتان ول 2018 جىلدان بەرٸ ارمەنييا ۇلتتىق قۇراماسى ساپىندا ويىن كٶرسەتٸپ كەلەدٸ. سونداي-اق, كوماندا قۇرامىندا قازاقستاندىق ەسٸمٸ جاقسى تانىس ۋكرايندىق دەنيس دەدەچكو دا بار.
ەستەرٸڭٸزگە سالا كەتەلٸك, ول 2015 جىلى «استانا» نامىسىن قورعاپ, 10 ويىندا 1 گول سوقتى. كوماندادا قاقپاشى قىزمەتٸن يتالياندىق ۆالەرو ۆيمەركاتي اتقارادى. ول يتالييانىڭ «ميلان» كومانداسىنىڭ جاستار قۇرامىندا ويناعان. ودان كەيٸن ٶز ەلٸنٸڭ, پورتۋگالييانىڭ «فاتيما» جەنە «لەيرييا» كلۋبتارىندا ويىن كٶرسەتتٸ. ٶتكەن جىلدان باستاپ «نوا» قۇرامىنا قابىلداندى.
ارمەنييالىق كلۋب ٶز تاريحىندا العاش رەت ەۋروكۋبوك ويىندارىندا باق سىناۋعا مٷمكٸندٸك الدى. سوندىقتان جارىستىڭ كەلەسٸ ساتىسىنا جولداما الۋعا بار كٷشٸن سالۋعا نيەت جاساپ وتىر.
«قايرات» كومانداسى جىلداعىداي بيىل دا توپتىق كەزەڭگە شىعۋدى الدىنا ماقسات ەتٸپ قويىپ وتىر. سول كٷشٸن ٶز قۇرامىنا كٶپتەگەن بەلگٸلٸ ويىنشىلاردى قوستى. ولاردىڭ قاتارىندا كەزٸندە رەسەيدٸڭ تسسكا (مەسكەۋ) كومانداسىندا دوپ تەپكەن برازيلييالىق ەيگٸلٸ فۋتبولشى ۆاگنەر لاۆ الدىمەن اتالادى. ودان باسقا دا فۋتبولشىلار بٷگٸن «قايراتتىڭ» جارىستىڭ كەلەسٸ ساتىسىنا بەرٸلەتٸن جولدامانى قول جەتكٸزۋٸنە ٷلكەن ٷلەس قوسادى دەگەن سەنٸم بار.
«قايرات» پەن «نوا» كوماندالارى اراسىنداعى كەزدەسۋ ەلوردا ۋاقىتىمەن 20.00-دە باستالادى. ويىن Qazsport تەلەرناسىنان تٸكەلەي ەفيردە كٶرسەتٸلەدٸ.
