اۋىل شارۋاشىلىعى مينيسترٸ ساپارحان وماروۆ بيداي ٶندٸرۋشٸلەر مەن ترەيدەرلەرگە ٸشكٸ نارىقتا بيدايدىڭ باعاسىن قىمباتتاتپاۋعا شاقىردى, دەپ حابارلايدى "ۇلت اقپارات".
«بٷگٸنگٸ تاڭدا ەلٸمٸزدەگٸ بيداي القابىنىڭ 99,5 پايىزى جينالدى. جالپى بيدايدىڭ كٶلەمٸ 20 ملن تونناعا جەتتٸ. بٸزدٸڭ بولجامىمىز بويىنشا تازا سالماقتاعى بيداي كٶلەمٸ – 18,5 ملن توننا بولادى. ەكسپورتتىق ەلەۋەت – 7-8 ملن توننا», - دەدٸ ساپارحان وماروۆ وكق-دا ٶتكەن باسپاسٶز مەسليحاتىندا.
بۇل رەتتە ەكسپورتقا قانداي دا بٸر كەدەرگٸ كەلتٸرٸلۋٸ مٷمكٸن بە? بۇل سۇراققا جاۋاپ بەرگەن مينيستر قازٸر بيداي ٶتكٸزۋگە بولاتىنداي جايلى جاعداي قالىپتاسىپ تۇرعانىن جەتكٸزدٸ.
«قازاقستاندا دا, رەسەيدە دە بيداي جاقسى شىقتى. بٸز الداعى ۋاقىتتا بيداي ەكسپورتىنا ەشقانداي شەكتەۋ ەنگٸزگەلٸ وتىرعان جوقپىز. سونىمەن قاتار مەن ٶزٸمٸزدٸڭ ەلدەگٸ تاۋار ٶندٸرۋشٸلەر مەن ترەيدەرلەردەن ٶتٸنسەم دەيمٸن: ٸشكٸ نارىقتاعى باعانى قالىپتاستىرۋ مەسەلەسٸنە بايىپپەن كەلگەن ابزال. سەبەبٸ ٸشكٸ نارىقتاعى باعانىڭ ٶسٸپ كەتۋٸ, بٸرٸنشٸدەن نارىققا جاعىمسىز ەسەر ەتەدٸ. ەكٸنشٸدەن وسىنىڭ سالدارىنان ۇننىڭ باعاسى قىمباتتاۋى مٷمكٸن. بۇل جاعداي ودان بٶلەك ەلەمدٸك نارىقتا بٸزدٸڭ بيدايىمىزدىڭ بەسەكەگە قابٸلەتتٸلٸگٸن تٶمەندەتۋٸ مٷمكٸن», - دەدٸ ول.
