Aýyl sharýashylyǵy ministri Saparhan Omarov bidai óndirýshiler men treiderlerge ishki naryqta bidaidyń baǵasyn qymbattatpaýǵa shaqyrdy, dep habarlaidy "Ult aqparat".
«Búgingi tańda elimizdegi bidai alqabynyń 99,5 paiyzy jinaldy. Jalpy bidaidyń kólemi 20 mln tonnaǵa jetti. Bizdiń boljamymyz boiynsha taza salmaqtaǵy bidai kólemi – 18,5 mln tonna bolady. Eksporttyq áleýet – 7-8 mln tonna», - dedi Saparhan Omarov OKQ-da ótken baspasóz máslihatynda.
Bul rette eksportqa qandai da bir kedergi keltirilýi múmkin be? Bul suraqqa jaýap bergen ministr qazir bidai ótkizýge bolatyndai jaily jaǵdai qalyptasyp turǵanyn jetkizdi.
«Qazaqstanda da, Reseide de bidai jaqsy shyqty. Biz aldaǵy ýaqytta bidai eksportyna eshqandai shekteý engizgeli otyrǵan joqpyz. Sonymen qatar men ózimizdiń eldegi taýar óndirýshiler men treiderlerden ótinsem deimin: ishki naryqtaǵy baǵany qalyptastyrý máselesine baiyppen kelgen abzal. Sebebi ishki naryqtaǵy baǵanyń ósip ketýi, birinshiden naryqqa jaǵymsyz áser etedi. Ekinshiden osynyń saldarynan unnyń baǵasy qymbattaýy múmkin. Bul jaǵdai odan bólek álemdik naryqta bizdiń bidaiymyzdyń básekege qabilettiligin tómendetýi múmkin», - dedi ol.
