قاراعاندى وبلىسىندا سۋ تاسقىنى كەزٸندە ٸز-تٷزسٸز جوعالعان ەكس-دەپۋتات نۇرلان سٷلەيمەنوۆتٸڭ دەنەسٸ بٸر اي دەگەندە ەرەڭ تابىلعان بولاتىن. قۇتقارۋشىلاردىڭ بٸرٸ ٸزدەۋ جۇمىستارىنىڭ نەلٸكتەن سوزىلىپ كەتكەنٸن تٷسٸندٸردٸ.
الەكساندر ۆيتسۋدىڭ ايتۋىنشا, كەسٸپكەردٸڭ دەنەسٸ ٶزەن تٷبٸندەگٸ شٸلٸكتەرگە شىرمالىپ قالعان.
شارۋا قوجالىعىنىڭ يەسٸ جوعالعاننان ەكٸ كٷننەن كەيٸن ونىڭ كٶلٸگٸ نۇرا ٶزەنٸڭ تاسسۋات اۋىلى ماڭىنداعى ٶتكەل تۇسىنان تابىلعان, دەپ حابارلادى كتك.
قىزىل سۋ جولدان اسقاندا سٷلەيمەنوۆ تٸزٸندەگەن كٶلٸك كٶپٸردەن تايىپ كەتۋٸ مٷمكٸن دەگەن بولجام بولدى. بٸراق ونىڭ ٶزٸ تابىلماي, ەل جۇرت قاستاندىق جاسالۋى مٷمكٸن دەپ سان-ساققا جٷگٸرتتٸ. ال تۋىستارى مارقۇم كەپٸلدە وتىر دەپ سوڭىنا دەيٸن ٷمٸت ٷزبەگەن. دەگەنمەن كٶلٸكتٸڭ كٶپٸردەن اۋىپ كەتكەنٸن كٶرگەندەر تابىلىپتى. سوندىقتان ٸزدەۋ جۇمىستارى توقتاتىلماي, ٶزەن ارناسىنىڭ 170 شاقىرىم جەرٸ تەكسەرٸلگەن. الايدا 62 جاستاعى كەسٸپكەردٸڭ دەنەسٸ كٶلٸك قۇلاعان جەردەن نەبەرٸ تٶرت شاقىرىم جەردەن سۋ دەڭگەيٸ تٶمەندەگەندە عانا كٶرٸنگەن.
