قر باس مەملەكەتتٸك سانيتار دەرٸگەرٸ ايجان ەسماعامبەتوۆا كارانتين شارالارىن ساقتاۋدىڭ ارالىق نەتيجەلەرٸ تۋرالى باياندادى, دەپ حابارلايدى "ۇلت اقپارات".
«23 شٸلدەدە رەسپۋبليكا بويىنشا كوروناۆيرۋس ينفەكتسيياسىنىڭ 76 799 جاعدايى تٸركەلگەن. ونىڭ ٸشٸندە 48 202 ناۋقاس نەمەسە ناۋقاستاردىڭ 63 پايىزى ەمدەلٸپ شىقتى. سىرقاتتانۋ تەۋلٸگٸنە 1600-1700 جاعداي دەڭگەيٸندە تۇراقتاندى. 5 شٸلدەدە قاتاڭ شەكتەۋ شارالارى ەنگٸزٸلگەن سەتتەن باستاپ ەكٸ اپتادا رەسپۋبليكادا كوروناۆيرۋستىڭ 21 532 جاعدايى تٸركەلدٸ. الدىڭعى ەكٸ اپتامەن سالىستىرعاندا سىرقاتتانۋ بٸر دەڭگەيدە قالىپ وتىر», - دەدٸ باس سانيتار دەرٸگەر ورتالىق كوممۋنيكاتسييالار قىزمەتٸندە ٶتكەن ونلاين بريفينگتە.
ونىڭ ايتۋىنشا, ماۋسىم ايىندا سىرقاتتانۋدىڭ اپتالىق ٶسۋ قارقىنى 1,3-تەن 2 ەسەگە دەيٸن ٶسكەن.
«قاتاڭ شەكتەۋ شارالارى ەنگٸزٸلگەننەن باستاپ شٸلدە ايىندا سىرقاتتانۋ دەڭگەيٸنٸڭ ٶسپەگەنٸ بايقالادى», - دەدٸ ا. ەسماعامبەتوۆا ورتالىق كوممۋنيكاتسييالار قىزمەتٸندە ٶتكەن ونلاين بريفينگتە.
