كەز كەلگەن ەلدٸڭ دەستٷرلٸ مەدەنيەتٸ مەن دٸني تانىمى سول ەلدٸڭ ۇلتتىق قاسيەتٸ مەن ۇلتتىق قۇندىلىعى بولىپ تابىلادى. بٸز سول ۇلتتى ۇلىلىققا باستايتىن دەستٷرلٸك سيپاتتى ۇمىتپاعان ەل ەدٸك. ەلٸمساقتان بەرٸ دٸن مەن دەستٷردٸ ٷيلەستٸرٸپ ٷيلەسٸمدٸ ٶمٸر سٷرگەن ٶنەگەلٸ ۇلت ەدٸك! يمانىمىز بەكەم, امالىمىز نىق بولاتىن. ال بٷگٸن شە? باسقا – باسقا, بٶلٸنبەگەن ەنشٸمٸز – داستارقاندى قۇرمەتتەمەۋدٸ قاي كەزدەن ۇمىتتىق? دەم-تۇزدان اتتاماۋدى بٸلەتٸن قازاق قۇرانعا ۇيىماۋدى نەگە ەستەن شىعاردى?
بٸز – باتا بەرٸلمەي اسقا قول سالماۋدى ٷيرەنگەن ھەم ٷلكەن مەكتەپ كٶرگەن ۇرپاقپىز. اتالارىمىز باتا بەرٸپ, الدىمەن سولار استان اۋىز تيگەننەن سوڭ عانا دەمگە قول سوزاتىن ەدٸك. جاسىنا قاراي تٶرگە وزدىرىپ جاعىنا قاراي سٶيلەيتٸن قازاقپىز! بٸراق قاشاننان بەرٸ قازاق بالاسى, تويدىڭ داستارقانىن بىلاي قويعاندا, قازاعا ارنالعان دەمدٸ قۇرمەتتەمەي, قۇران باعىشتالماي تۇرىپ, بٸردەن دەمدٸ باسسالىپ, ٸشٸپ-جەۋدٸ باستايتىن بولعان?
قۇران وقىلىپ جاتقاندا ورنىنان تۇرىپ ەرلٸ-بەرلٸ جٷرەتٸندەردٸ قوسىڭىز بۇعان. ٷلكەننەن كٸنە ٸزدەيٸن دەسەڭ, بەرٸ دە – اۋىلدان شىققان, اتا-ەجەنٸڭ تەربيەسٸن كٶرگەندەر, قالالىق بولعاندارى مۇندا عانا. كٸشٸنٸ كٸنەلايىن دەسەڭ, الدىڭعى بۋىن – ٷلكەننٸڭ كٶرسەتٸپ وتىرعانى مىناۋ. قاتەلٸك قايدان كەتتٸ? «قازانىڭ جولى – جٸڭٸشكە, ارۋاقتىڭ ورنى – بيٸكتە» دەپ ارۋاعىن ارداقتاعان ەل ەمەس پە ەدٸك! ارۋاق سىيلاي بٸلمەسەك, بٸر-بٸرٸمٸزدٸ تٸرشٸلٸگٸمٸزدە قادٸرلەگەنٸمٸز قايسى? كٶڭٸلدٸڭ ٸزدەيتٸنٸ كٶپ, تابارى جوق.
ٶمٸر بار جەردە ٶزەكتٸ ٶلٸمنٸڭ بولۋى دا – زاڭدىلىق. باسى قارالى, جٷرەگٸ جارالى, قازا قابىرعاسىنا باتقان جاننىڭ ٶتٸنٸشٸمەن داستارقاننىڭ تٸزگٸنٸن ۇستايتىن سونداي سەتتەردە بايقاعانىم – داستارقانعا وتىرا ساپ, الدىنداعى استى اسىعىس قاربىتىپ, ٸشٸپ-جەۋدٸ باستاپ كەتەتٸندەر, قۇران ٷنٸن ۇيىپ تىڭداۋ بىلاي تۇرسىن, يمامنىڭ داۋىسى ەستٸلگەندە الدىندا تۇرعان سالفەتكا قاعازدى جالما-جان باسىنا جاباتىن ەيەلدەر...
وسىنداي ٶتە سٷيكٸمسٸز ەرٸ ٶرەسكەل ەرسٸ كٶرٸنٸستەرگە جانىم اۋىرعاننان اراسىندا ەسكەرتٸپ ايتقان كەزدەرٸم بولدى. «ەلگٸندەي ەيەل زاتى قايتىپ ەنە اتانىپ, قانداي ەجە بولماق» دەگەن ويعا قالام. ۇلتتىڭ بولاشاعى ەيەلدٸڭ قولىندا بولعانىمەن تاعدىرى – ەر-ازاماتتىڭ ۋىسىندا.
ەندەشە, داستارقان سىيلاۋدى, دەم اتتاماۋدى, اس پەن توي يەسٸن قۇرمەتتەۋدٸ, سالتتى ساقتاپ, دەستٷردٸ دەرٸپتەۋدٸ ەڭ بٸرٸنشٸ بٷگٸن ٶزٸمٸزدەن باستاماساق, ەرتەڭ كەشٸگەمٸز. ال بۇل – وپ-وڭاي, ٶلٸمدٸ جەرگە كەلە جاتىرسىڭ با, بٸر شارشى ورامال سال باسىڭا, باتا جاسالماي نەمەسە قۇران وقىلماي دەمگە قول سوزبا! قۇران وقىلىپ جاتقاندا كٷيٸپ بارا جاتقان نەرسە جوق, شامالى سابىر ساقتاپ, تٸزەڭدٸ بٷك, ارۋاقتى ەسكە ال, تٸرشٸلٸگٸڭە تەۋبە قىلىپ بەتٸڭدٸ سيپا! مۇنىڭ بەرٸ – جارلىقپەن بەكٸتٸلٸپ, ارنايى قاۋلى-قاراردى تالاپ ەتپەيتٸن ۇلتتىق قۇندىلىق. ۇلتىڭدا باردى ارداقتاۋ ارقىلى ۇل-قىزىڭا وسىنداي ۇلاعاتتى سٸڭٸرە الماقسىڭ. ال ۇلتقا ەڭبەك ەتۋ, ۇرپاققا ۇلتتىق قاسيەتتٸ ۇقتىرۋ – سٸز بەن بٸزدٸڭ مٸندەتٸمٸز!
بەكجان تۇرىستىڭ فەيسبۋكتاعى جازباسىنان
