مەملەكەتتٸك قىزمەتشٸلەر كٷنٸ قارساڭىندا قازاقستان رەسپۋبليكاسىنىڭ مەملەكەتتٸك قىزمەت ٸستەرٸ اگەنتتٸگٸ تٶراعاسىنىڭ ورىنباسارى دارحان جازىقباەۆتى ەڭگٸمەگە تارتتىق.
اگەنتتٸك ٶكٸلٸنٸڭ ايتۋىنشا, ەلٸمٸزدە قازٸرگٸ ۋاقىتتا ناقتى 90 مىڭ مەملەكەتتٸك قىزمەتشٸ ەڭبەك ەتۋدە. ولاردىڭ مەرتەبەسٸ, ايلىعىنىڭ مەسەلەسٸ, جالپى شتات سانىن وڭتايلاندىرۋ مەن جاستاردى وسى قاتارعا تارتۋ شارۋاسى ماڭىزعا يە ەكەنٸ داۋسىز. بيلٸك ورگاندارىندا جٷرگەن بٷگٸنگٸ كەسٸبي مەرەكە يەلەرٸنە قاتىستى سۇحباتتى نازارلارىڭىزعا ۇسىنىپ وتىرمىز.
- دارحان مەدەعاليۇلى, كەسٸبي مەرەكەلەرٸڭٸز قۇتتى بولسىن! قازٸرگٸ تاڭدا مەملەكەتتٸك قىزمەتتە ەڭبەك ەتۋ – جاستار ٷشٸن قانشالىقتى تارتىمدى?
- يە, راحمەت كٶپ. ەڭگٸمەمٸزدٸ باستاماس بۇرىن ەلٸمٸزدەگٸ مەملەكەتتٸك قىزمەتشٸلەردٸڭ بەرٸن دە كەسٸبي مەرەكەسٸمەن قۇتتىقتاعىم كەلەدٸ. مەملەكەتكە قىزمەت – ەلگە قىزمەت ەرٸ زور جاۋاپكەرشٸلٸك. وسى جولدا بارشا ەرٸپتەستەرٸمنٸڭ ەڭبەگٸ جەمٸستٸ بولسىن!.
جالپى جاستاردى مەملەكەتتٸك باسقارۋشى ورگاندارعا, كۆازيمەملەكەتتٸك باسقارۋشى كومپانييالارعا تارتىپ, بٸلٸمدٸ ەرٸ بٸلٸكتٸ, ٶرشٸل, حالىقتىڭ جاعدايىن ويلايتىن ازاماتتارعا مٷمكٸندٸك بەرۋ - پرەزيدەنت قاسىم-جومارت كەمەلۇلى توقاەۆتىڭ اگەنتتٸكتٸڭ الدىنا قويىپ وتىرعان تاپسىرماسى. سەبەبٸ ٶزٸڭٸز بٸلەتٸندەي, بىلتىر جەلتوقسان ايىندا پرەزيدەنتتٸك كادرلىق رەزەرۆ ارقىلى 300 ادامدى جاساقتاۋ جۇمىسىن اياقتاعان ەدٸك. قاڭتار ايىندا مەملەكەت باسشىسى سول 300 جاستى قابىلداپ, باعىت-باعدار بەرٸپ, ەرەكشە كٶڭٸلمەن قولداۋ كٶرسەتتٸ. بۇل – جالپى جاستارىمىزعا ٷلكەن دەمەۋ دەپ ويلايمىن. جاستار جىلى دەل وسىنداي قولداۋمەن ٶتە تابىستى اياقتالدى.
قازٸر جاستار مەملەكەتتٸك قىزمەتكە كەلٸپ, جۇمىس ٸستەگٸسٸ كەلەدٸ. بٸراق بٷگٸنگٸ كٷنگٸ نارىقتىق ەكونوميكاعا بايلانىستى كٶپتەگەن سۇراق تۋىنداۋى مٷمكٸن. سەبەبٸ جاستارىمىز جاقسى جالاقى الىپ, ٸستەگەن جۇمىسىنا قاراي ەلەۋمەتتٸك تۇرعىدا قورعالسام دەيدٸ. بٸز ەلەمنٸڭ بٸر بٶلشەگٸمٸز. ەلەمدە بولىپ جاتقان ٶزگەرٸستەر بٸزگە دە كەلەدٸ. جاستار الىس-جاقىن شەتەلدەگٸ باسقا مەملەكەتتٸك قىزمەتشٸلەردٸڭ ەلەۋمەتتٸك قورعالۋ جاعىنا دا مەن بەرٸپ قارايدى, سالىستىرادى. ول جاعىنان بٸزدەگٸ مەمقىزمەتشٸلەردٸڭ مەرتەبەسٸ كەرەمەت بولماعانىمەن قازٸرگٸ تاڭدا ەلدەگٸ 90 مىڭ ەكٸمشٸلٸك-مەملەكەتتٸك قىزمەتشٸنٸڭ 20 مىڭنان استامى – 22,4 پايىزى جاستار. ەيتسە دە مەملەكەتتٸك قىزمەتكەرگە قويىلاتىن تالاپتاردى وڭتايلاندىرۋمەن قاتار ولاردىڭ ەلەۋمەتتٸك-ماتەريالدىق جاعدايى دا جاقسارىپ كەلەدٸ. سول سەبەپتٸ كەسٸبي بٸلٸكتٸلٸگٸ جوعارى جاستارىمىز, ەسٸرەسە مەملەكەتتٸك تٸلدٸ قازاق جاستارى تاراپىنان قىزىعۋشىلىق جوعارى دەپ ايتۋعا بولادى.
بۇل تۇرعىدا مەنتالدىق ەرەكشەلٸك بارىن ايتا كەتۋٸمٸز كەرەك. سەبەبٸ, جاستاردىڭ «ەلگە قىزمەت ەتسەم» دەيتٸن ارمان-تٸلەگٸ تازا, بولاشاققا دەگەن سەنٸمٸ مول. وسى جاعدايدى پرەزيدەنتٸمٸز قاسىم-جومارت كەمەلۇلى توقاەۆ تا كٶرٸپ وتىر. مەملەكەت باسشىسى جاستارعا ناقتى جاۋاپكەرشٸلٸك جٷكتەدٸ. بايقاساڭىزدار, 300 جاس ٶرەننٸڭ كادرلار رەزەرۆٸنە الىنۋى, ولارعا ماڭىزدى قىزمەتتەردٸ تاپسىرۋ – ەلٸمٸزدە بۇرىن-سوڭدى بولىپ كٶرمەگەن وقيعا. بۇل قادام – بٷگٸنگٸ كٷننٸڭ تالابى.
الداعى ۋاقىتتا ٶتەتٸن پارلامەنت سايلاۋىنىڭ نەتيجەسٸندە دەپۋتاتتاردىڭ كەم دەگەندە 20 پايىزىن جاستار قۇرايدى. ياعني جاس بۋىننىڭ بٸراز ٶكٸلٸ زاڭ شىعارۋشى بيلٸككە كەلەدٸ. بۇل دا ەرەكشە قۇبىلىس بولايىن دەپ تۇر. سوندىقتان دا جاستارىمىز بٸر نەرسەنٸ قاتاڭ ەسكەرگەنٸ جٶن – ەلگە قىزمەت ەتۋ جولىندا شالىس باسپاي, ەردايىم حالىقتىڭ پٸكٸرٸنە قۇلاق اساتىن بيلٸك تۇجىرىمىن ەستە ۇستاعان ابزال.
«مەملەكەتتٸك قىزمەتتەن نە الامىن?» دەپ ەمەس, «مەملەكەتكە نە بەرەمٸن? مەن پرەزيدەنتتٸڭ حالىق ٷنٸنە قۇلاق اساتىن مەملەكەت تۇجىرىمداماسىن ٸسكە اسىرۋ ٷشٸن قانداي جاۋاپكەرشٸلٸكتٸ الۋىم كەرەك» دەپ ويلاۋى كەرەك.
شىنى كەرەك, سالىستىرمالى تٷردە سٶيلەسەك اينالىپ كەلٸپ تاريحقا جٷگٸنەمٸز. قانشا زوبالاڭدى كٶردٸك, زۇلماتتى باستان كەشٸردٸك. سول كەزدەگٸ زييالىلارىمىز, اتالارىمىز «ەلدەن بٸر نەرسە الامىن» دەپ قىزمەت ەتپەگەن. ەلدٸ ساقتاۋدى ويلاعان. وسى جولدا قانشاما ارىسىمىز ٶزٸن قۇربان قىلدى. بٸزدٸڭ جاستار ٶتكەنٸن ۇمىتپاۋى كەرەك. مەملەكەتتٸك قىزمەتشٸلەر وسى قاعيدانى ەردايىم ساناسىنان شىعارماسا دەيمٸن.
ەستەرٸڭٸزدە بولسا جاستارمەن كەزدەسۋ كەزٸندە مەملەكەت باسشىسى ولاردىڭ ەسٸنە الاش ارداقتىسى ەليحان بٶكەيحاننىڭ «ۇلتقا قىزمەت ەتۋ بٸلٸمنەن ەمەس, مٸنەزدەن» دەگەن سٶزٸن ەسكە سالعان بولاتىن. تٷسٸنگەنگە – بۇل ٷلكەن ٷندەۋ. پرەزيدەنت وسى ٷندەۋٸمەن جاستاردى ەلگە ادال قىزمەت ەتۋگە شاقىرىپ وتىر.
قازٸرگٸ كەزدە مەملەكەتتٸك قىزمەتشٸلەردٸ كٶپ سىناپ جاتادى. قوعام تالقىسىنا تٷسٸپ جاتاتىندارى قانشاما. بٸراق سول مەملەكەتتٸك قىزمەتتەگٸ جاستار قايدان شىقتى? ادامدى قالىپتاستىراتىن ورتا عوي. بالا كەزدەن ادامنىڭ مٸنەزٸنە, وقۋىنا, بٸلٸمٸ مەن تەربيەسٸنە وتباسى جاۋاپتى. ٶسە كەلە بالا دوستارىنىڭ, كەيٸن اعايىن-تۋسىنىڭ ورتاسىنا كەلەدٸ. سوندا مەملەكەتتٸك قىزمەتشٸ بولىپ, وعان ەلگە قىزمەت ەتۋگە كٸم ەسەر ەتەدٸ? ەلبەتتە ورتا! مەملەكەتتٸك قىزمەتشٸ ناشار بولسا, ونى قورشاعان ورتادا بٸر كٸلتيپان بار دەگەن سٶز. ال بٸزدە بٸردەن مەملەكەتتٸك قىزمەتشٸنٸ ايىپتاپ شىعا كەلەدٸ. ال مەملەكەتتٸك قىزمەتشٸ – وسى ورتادان, قوعامنان شىعىپ وتىرعان قازاقستاننىڭ ازاماتى. سول سەبەپتٸ مەملەكەتتٸك قىزمەتشٸگە ورتانىڭ تيگٸزەر ەسەرٸ بار دەپ ويلايمىن.
- مەملەكەتتٸك قىزمەتشٸلەردٸڭ ساق بولۋ كەرەكتٸگٸن ايتىپ جاتىرسىز. ەيتسە دە ساقتىقتى ويلاماي, اقىرى ەرتٷرلٸ ەرەكەتتەرٸ ٷشٸن ەلەمجەلٸدە كٶپتەن كەشٸرٸم سۇراپ جاتاتىندارى بار. ەكٸنشٸ جاعىنان مەمقىزمەتشٸلەر دە ٶزٸمٸز قاتارلى ادامدار – بٸرەۋگە اعا, بٸرەۋگە باۋىر, اعايىن, دوس. توي-جيىنداردا بيلەگەن بٸر ۆيدەوسى تاراسا دا كٶپتٸڭ تالقىسىنا ۇشىراپ كەتۋٸ مٷمكٸن. مەمقىزمەتشٸلەرگە وسىناۋ تىيىم مەن رۇقساتتىڭ ارا-جٸگٸن تٷسٸندٸرٸپ بەرەسٸز بە?
- ساق بولۋ تۋرالى ەڭگٸمەمنٸڭ ٶزەگٸ – مەملەكەتتٸك مٷددەگە ساق بولۋعا قاتىستى وي. سەبەبٸ بٸز مەملەكەت مٷددەسٸن باسقا مەملەكەتتٸڭ الدىندا دا قورعايمىز. مەملەكەتتٸڭ مٷلكٸن تازا ۇستاۋىمىز كەرەك. وسى جاعىنان ساق بولۋ كەرەكتٸگٸن ايتىپ جاتىرمىن.
ولاردىڭ ەتيكاسىنا كەلسەك, مەملەكەتتٸك قىزمەتشٸلەردٸڭ ەدەپ جٶنٸندەگٸ كودەكسٸ قايتادان قارالۋدا. شەتەلدٸك مەملەكەتتەردٸڭ ەدەپ كودەكستەرٸن تالداپ, سالىستىرمالى تٷردە قاراپ تا كٶردٸك. راسىمەن دە بٸزگە قوعام تاراپىنان باقىلاۋ بولۋى كەرەك. پرەزيدەنت ٶزٸ ايتقانداي «ەر ەكٸمدٸ حالىق باعالاۋى كەرەك». بٸراق قاي جاعىنان? ونىڭ جۇمىسى قاداعالانۋى تيٸس. ياعني مەملەكەتتٸك قىزمەتتە جٷرسەڭٸز جۇمىستاعى ارتىقشىلىقتى ٶز مٷددەڭٸزگە پايدالانباۋىڭىز كەرەك.
ال جۇمىس ۋاقىتىنان كەيٸن دوستارىمەن بارىپ, كەشكٸ اس ٸشسە نەمەسە اعايىننىڭ قۋانىشىنا بارسا – وندا تۇرعان ەشتەڭە جوق. ول جەردە ەڭ باستى ول دٶرەكٸلٸك كٶرسەتپەۋٸ تيٸس. جالپى قوعامدىق ورتادا تەرتٸپ بۇزباۋ – جالعىز مەملەكەتتٸك قىزمەتشٸگە بايلانىستى ەمەس. بەرٸ دە زاڭدى ساقتاۋعا مٸندەتتٸ. سوندىقتان ەگەر مەملەكەتتٸك قىزمەتشٸ ٶزٸن تەرتٸپتٸ بولىپ جٷرسە – وندا تۇرعان ەشتەڭە جوق دەپ ويلايمىن. جۇمىستان كەيٸن شەكتەۋ بولماۋى كەرەك.
- پرەزيدەنتتٸڭ تٸكەلەي ۇسىنىسىمەن كادرلىق رەزەرۆ بويىنشا ٸرٸكتەلگەن 300 جاس ٶرەننٸڭ قانشاسى مەملەكەتتٸك قىزمەتكە ورنالاستى? ولار سەنٸمدٸ اقتاپ جاتىر ما?
- وسى كٷنگٸ مەلٸمەتكە ساي, كادرلىق رەزەرۆكە ٸرٸكتەلٸپ الىنعان 300 ازاماتتىڭ 137-سٸ قىزمەتكە ورنالاستى. ولار مينيسترلٸكتٸڭ جاۋاپتى حاتشىسىنان باستاپ, وبلىس ەكٸمٸنٸڭ ورىنباسارى, اپپارات باسشىسى نەمەسە مينيسترلٸكتەردەگٸ دەپارتامەنت ديرەكتورى قىزمەتتەرٸنە تاعايىندالىپ جاتىر. ەلٸ دە ۇسىنىستار بەرٸلۋدە. اۋدان ەكٸمٸنٸڭ ورىنباسارلىعىنا نەمەسە باسقا دا جەرگٸلٸكتٸ اتقارۋشى ورگاندارعا ۇسىنىستار جولداندى. ەيتسە دە جاستاردىڭ بٸرقاتارى ورتالىقتان كٶشكٸلەرٸ كەلمەيدٸ. شالعاي اۋداندارعا بارعىسى جوق. دەگەنمەن جاۋاپكەرشٸلٸگٸ مول جۇمىستى تەجٸريبەسٸ بار جاس ازاماتتار, ەرينە ايتۋلى لاۋازىمدارعا قويىلادى.
ٸرٸكتەۋ جۇمىسى بەكٸتٸلگەن تەرتٸپكە ساي جٷرگەندٸكتەن, بۇل جاستاردىڭ ەتيكالىق تالاپتارعا دا ساي بولۋىن قاتال باقىلادىق. سوندىقتان وسى كٷنگە دەيٸن سەنٸم اقتالمادى دەيتٸندەي فاكت تٸركەلگەن جوق. ولاردىڭ بٸلٸمٸ مەن بٸلٸكتٸلٸگٸنە بايلانىستى ەسكەرتۋلەر تٷسكەن ەمەس. كەرٸسٸنشە, قوعام تاراپىنان بولسىن, جۇمىس بەرۋشٸ مەملەكەتتٸك ورگان تاراپىنان بولسىن جاعىمدى پٸكٸرلەردٸ كٶپ ەستيمٸن. بەرٸ جۇمىستارىن ادال اتقارىپ جاتىر.
- بىلتىر انار نۇرالىقىزىمەن (مەملەكەتتٸك قىزمەت ٸستەرٸ اگەنتتٸگٸنٸڭ تٶراعاسى) سۇحباتتاسقانىمدا «2024 جىلعا دەيٸن مەملەكەتتٸك قىزمەتكەرلەردٸڭ سانىن 25 پايىزعا دەيٸن ازايتۋ» تۋرالى پرەزيدەنتتٸڭ تاپسىرماسى جايلى ەڭگٸمە ٶربٸتكەن ەدٸك. انار جايىلعانوۆا ونىڭ الدىندا مٸندەتتٸ تٷردە ساراپتاما جٷرگٸزٸلەتٸنٸن مەلٸم ەتكەن. وسى ساراپتاما جۇمىستارى جايلى ايتىپ بەرسەڭٸز.
- جالپى قىزمەتتٸك شتات سانىن تۇراقتى تٷردە قاراپ, ارتىعىن قىسقارتىپ وتىرعان جٶن دەپ ويلايمىن. سەبەبٸ كەز كەلگەن مەكەمەنٸڭ جىل ٶتكەن سايىن قۇزىرەتٸنە كٸرەتٸن سۇراقتارى دا كەڭەيٸپ, شتات سانى ۇلعايۋعا بەيٸم تۇرادى. مۇنى ەكٸمشٸلك باسقارۋ عىلىمىندا «پاركينسون زاڭدىلىعى» دەپ اتايدى. سوندىقتان بٸر رەتتٸك قىسقارتۋمەن مەسەلەنٸ تٷبٸرٸمەن شەشٸپ تاستاۋ دەگەن - ٷستٸرتتەۋ كٶزقاراس. دەگەنمەن, قىسقارتۋ جۇمىستارىنىڭ دا قيسىنى بولۋى تيٸس. بۇل ارادا بەلدەن باسۋ ەمەس, تيٸمدٸلٸك پەن نەگٸزدٸلٸك قاعيدالارى باسشىلىققا الىنعانى جٶن. مەسەلەن, بٸرٸن-بٸرٸ قايتالايتىن ٶكٸلەتتٸكتەر بار نەمەسە قۇزىرەتتٸڭ پەنٸنە كٸرەتٸن سۇراقتار مەملەكەتتٸك ورگاننىڭ تاعايىنداۋىمەن سىيىسپاي جاتادى. جالپى, ەر مەملەكەتتٸڭ ٸشكٸ جەنە سىرتقى فۋنتسييالارىنا ساي مەملەكەتتٸك ورگانداردىڭ جٷيەسٸ تٷزٸلەدٸ. ەربٸر فۋنكتسييانىڭ جۇمىس ٸستەۋٸ ٷشٸن قانداي دا بٸر ۆەدومستۆو قۇرىلىپ, ونىڭ ماقساتى مەن مٸندەتتەرٸ ايقىندالادى. وسىلاردان شىعا وتىرىپ قۇزىرەت پەن ٶكٸلەتتٸلٸك بەلگٸلەنەدٸ. قۇزىرەت دەگەنٸمٸز مەملەكەتتٸك ورگاننىڭ قاراۋىنا جاتاتىن سۇراقتار, ال ٶكٸلەتتٸك دەپ سول سۇراقتاردى يگەرۋگە قاجەتتٸ قۇقىقتار مەن مٸندەتتەردٸڭ جٷيەسٸن اتايمىز. بۇلاردىڭ سىرتىندا مەملەكەتتٸك بيلٸكتٸڭ ٷش تارماققا بٶلٸنٸپ, ولاردىڭ ٶزارا تەپە-تەڭدٸك جەنە تەجەمەلٸك قاعيداعا سەيكەس جۇمىس ٸستەۋ تەرتٸبٸ تاعى بار. مۇنىڭ دا تابيعاتىن ەسكەرۋ قاجەت. بايقاپ وتىرساڭىز وسى ايتىلعان دٷنيەلەردٸڭ بەرٸندە بٸرٸن تارتساڭ (جالقى) ەكٸنشٸسٸ (جالپى) شىعاتىن لوگيكاسى تاستاي ٶزارا بايلانىستى قۇرىلىم جاتىر. وسىلاردى كەستەگە سالىپ ٸرٸكتەپ, سٷزٸپ شىعۋ قاجەت. سوندا عانا ارتىق-كەمٸ بٸلٸنٸپ, تولىققاندى تۇجىرىم ايتۋعا بولادى. مۇنى بٷگٸن ۇلتتىق ەكونوميكا مينيسترلٸگٸ قاراستىرىپ جاتقاندىقتان, بٸز كٶرسەتكەن مەسەلەلەرگە دۇرىس مەن بەرٸلسە, ۇتىمدى شەشٸم قابىلدانادى دەپ ويلايمىن.
مەملەكەت باسشىسى 2024 جىلعا دەيٸن مەملەكەتتٸك قىزمەتشٸلەردٸڭ سانىن 25 پايىزعا دەيٸن ازايتۋ تۋرالى ٷكٸمەتكە تاپسىرما بەردٸ. جالپى شتات سانىن قىسقارتۋ, كٶبەيتۋ نەمەسە مەملەكەتتٸك باسقارۋ تەتٸكتەرٸن ارى قاراي جەتٸلدٸرۋ جۇمىسى ۇلتتىق ەكونوميكا مينيسترلٸگٸنە جٷكتەلگەن. سولاردىڭ قۇزىرەتٸنە كٸرەدٸ. ال بٸز تالاپتارىمىز بەن ۇسىنىستارىمىزدى ولارعا بەردٸك. ول ۇسىنىستار ەسكەرٸلسە بۇل جۇمىس سەتتٸ اتقارىلادى دەگەن ويدامىز. سەبەبٸ شتاتتاردىڭ قىسقارۋى نەمەسە كٶبەيۋٸ – الدىمىزعا قويىلىپ وتىرعان ستراتەگييالىق ماڭىزى بار جۇمىستارعا بايلانىستى. كەيبٸر مينيسترلٸكتەرگە ستراتەگييالىق ماڭىزى بار قۇزىرەت جٷكتەلەر بولسا, ەرينە ولاردا قوسىمشا دەپارتامەنتتەر اشىلىپ, شتات سانى كٶبەيەدٸ. ال كەيبٸر جەردە فۋنكتسييالارىن زەرتتەي وتىرىپ, قۇزىرەتٸ بولماسا ورگانداردى قىسقارتىپ وتىرۋ كەرەك.
- نۇر-سۇلتان مەن ماڭعىستاۋ وبلىستارىنىڭ ەكٸمدٸكتەرٸ, قاتەسەلەسپەسەم, ەدٸلەت مينيسترلٸگٸندە پيلوتتىق رەجٸمدە ەكٸمشٸلٸك مەملەكەتتٸك قىزمەتشٸلەرگە ەڭبەكاقى بەرۋدٸڭ جاڭا جٷيەسٸ ەنگٸزٸلگەن بولاتىن. جوبا نەتيجەسٸن انار جايىلعانوۆا 2019 جىلدىڭ جەلتوقسانىندا شىعاتىنىن ايتقان ەدٸ. سول جوبانىڭ نەتيجەسٸ نە بولدى? پيلوتتىق جوبانىڭ تەجٸريبەسٸ باسقا ٶڭٸرلەرگە ەنگٸزٸلەتٸن بولدى ما?
- مەملەكەتتٸك قىزمەتشٸنٸ ىنتالاندىرۋدىڭ زامانعا ساي قۇرالى رەتٸندە, وعان اقى تٶلەۋدٸڭ جاڭاشا تەرتٸبٸ (فاكتورلى-بالدىق شكالا بويىنشا) ٸلكٸ جوبا رەتٸندە بٸرقاتار ورتالىق مەملەكەتتٸك جەنە جەرگٸلٸكتٸ اتقارۋشى ورگاندار دا ەنگٸزٸلگەن بولاتىن. بۇل – ەلباسى نۇرسۇلتان نازارباەۆتىڭ «100 ناقتى قادام» رەفورماسىنا ەنگەنٸن بٸلەسٸز. بٷگٸن دە ەلٸ ەكسپەريمەنتتەن ٶتٸپ جاتقان جايى بار. سوندىقتان قانداي دا بٸر پايىم ايتۋ ەلٸ ەرتەرەك.
ٶزٸڭٸز بٸلەتٸندەي ەدٸلەت مينيسترلٸگٸ, مەملەكەتتٸك قىزمەت ٸستەر جٶنٸندەگٸ اگەنتتٸك, نۇر-سۇلتان قالاسى مەن ماڭعىستاۋ وبلىسىنىڭ ەكٸمدٸكتەرٸ وسى جٷيەنٸ تەستٸلەۋدەن ٶتكٸزٸپ جاتىر. بۇعان جاقىندا اتىراۋ, قاراعاندى جەنە پاۆلودار وبلىستارى قوسىلدى. بۇل سۇراقپەن ۇلتتىق ەكونوميكا مينيسترلٸگٸ اينالىسۋدا. جالپى جوبانىڭ باعىتىن دۇرىس دەپ ويلايمىن.
ەلٸمٸز بويىنشا مەملەكەتتٸك قىزمەتشٸلەردٸڭ ورتاشا ايلىق جالاقىسى 169 مىڭ تەڭگە بولسا, ٶڭٸرلەردە 134 مىڭ تەڭگەنٸ قۇرايدى. مەسەلەنٸڭ ەكٸ جاعى بار: بٸرٸنشٸ فورمالدى تۇسى. وعان سەيكەس ايتىلعان جالاقى اعىمداعى زاڭنامالىق اكتٸلەردە بەلگٸلەنگەن تۇتىنۋشىلىق جەنە ٶمٸر سٷرۋ يندەكستەرٸ سەكٸلدٸ كٶرسەتكٸشتەردٸ ەسەلەپ ورىندايدى. تمد ەلدەرٸنٸڭ ٸشٸندە دە بۇل مەسەلە بويىنشا كٶش باسىندامىز. بٸراق ٶزٸمٸزدە مەملەكەتتٸك قىزمەتشٸ بولعاندىقتان مەسەلەنٸڭ ەكٸنشٸ ۇشى بار – ول تۇرمىستىق قاجەتتٸلٸكتەردٸڭ ەردايىم ٶسٸپ وتىرعاندىعى. سوندىقتان تولىقتاي جەتەدٸ دەپ تە ايتا المايمىن. بۇل ارادا, شىعىستاردى جوسپارلاۋدىڭ ماڭىزى جوعارى. سونداي-اق مەملەكەتتٸك قىزمەتشٸلەرگە كٶرسەتٸلەتٸن ەلەۋمەتتٸك جەڭٸلدٸكتەر جٷيەسٸ دە بٸراقتار تۇرمىستىق مەسەلەلەردٸڭ وڭتايلى شەشٸلۋٸنە مٷمكٸندٸك بەرەدٸ. مۇنى دا ەسكەرگەن جٶن.
- «ٷزدٸك اۋىلدىق وكرۋگ ەكٸمٸ» كونكۋرسىن جارييالاپ جاتقانىڭىزدى ەستٸگەن ەدٸك. وسى كونكۋرس تۋرالى ايتىپ ٶتسەڭٸز ?.
- كونكۋرس مەملەكەت باسشىسى قاسىم-جومارت كەمەلۇلى توقاەۆتىڭ «حالىق ٷنٸنە قۇلاق اساتىن مەملەكەت» تۇجىرىمداماسىن ٸسكە اسىرۋ ماقساتىندا ەرٸ «رۋحاني جاڭعىرۋ» باعدارلاماسى اياسىندا ٶتكٸزٸلٸپ جاتىر. بىلتىر حالىققا جولداۋىندا پرەزيدەنت ەكٸمدەردٸ الداعى ۋاقىتتا حالىقتىڭ ٶزٸ باعالاۋى كەرەكتٸگٸن ايتقانىن جوعارىدا اتاپ ٶتتٸك. وسىعان بايلانىستى بٸز پرەزيدەنت تاپسىرماسىن ورىنداۋدى اۋىلدىق وكرۋگ ەكٸمدەرٸنەن باستادىق.
كونكۋرس ارقىلى اۋىلدىق وكرۋگ ەكٸمدەرٸنٸڭ حالىققا مەملەكەتتٸك قىزمەت كٶرسەتۋ ساپاسىن باعالايمىز. ەكٸنشٸدەن, ەكٸمنٸڭ جٷرٸس-تۇرىسى, ەدەبٸ, ەلگە ٷلگٸ بولارلىق قانداي جۇمىس اتقاردى – سٷزگٸدەن ٶتكٸزەمٸز. ينتەرنەت ۇستاپ تۇرعان جەردە ونلاين, ياعني حالىقتىڭ ٶزٸنە سۇراۋ سالۋ ارقىلى كونكۋرستىڭ نەتيجەسٸن شىعارامىز.
بٷگٸنگٸ تاڭدا وبلىس دەڭگەيٸندە كوميسسييالار قۇرىلعان. بٸزدٸڭ دەپارتامەنت سول جۇمىستاردى اتقارىپ جاتىر. كونكۋرستىڭ قورىتىندىسى قىركٷيەك ايىنىڭ سوڭىندا شىعادى. ەر ٶڭٸردەن بٸر-بٸر ەكٸم رەسپۋبليكالىق بايقاۋعا كەلٸپ قاتىسادى. كونكۋرس بٸرەگەي ەرٸ نەتيجەلٸ بولارىنا سەنەمٸن. قاتىسۋشىلاردىڭ بەرٸنە سەتتٸلٸك تٸلەيمٸز.
- سۇحبات بەرگەنٸڭٸز ٷشٸن كٶپ راحمەت!
قازاقپارات اگەنتتٸگٸ
