ريو-دە جانەيرو وليمپياداسىنىڭ چەمپيونى دانييار ەلەۋسٸنوۆ بوكستان قازاقستان ۇلتتىق قۇراماسىنا قايتا ورالدى. بۇل تۋرالى دانيياردىڭ ٶزٸ ايتىپ بەردٸ, دەپ جازادى قازاقپارات.
«مەن ۇلتتىق قۇراماعا قايتا ورالدىم. اللا قالاسا الداعى ۋاقىتتا بۇرىنعىداي قۇراما ساپىندا ٶنەر كٶرسەتەتٸن بولام. قازٸر استانادا وتباسىممەن بٸرگە دەمالىپ جاتىرمىن. بۇيىرسا دايىندىقتى باستايتىن كٷندەرٸم دە الىس ەمەس», - دەپ اتاپ ٶتتٸ ول.
سونىمەن قاتار ول الداعى ۋاقىتا «قاي سالماقتا ٶنەر كٶرسەتەسٸز?» دەگەن سۇراعىمىزعا دا كەسٸمدٸ جاۋابىن بەردٸ.
«مەن «قازاقتىڭ سالماعى» اتانىپ كەتكەن 69 كەلٸدە وليمپيادا چەمپيونى اتاندىم. 4-5 جىل وسى سالماقتا ٶنەر كٶرسەتتٸم. الداعى ۋاقىتتا دا وسى سالماقتا قالا بەرەمٸن», - دەدٸ دانييار ەلەۋسٸنوۆ.
ەستەرٸڭٸزگە سالا كەتەيٸك, دانييار ەلەۋسٸنوۆ ريو وليمپياداسىنان كەيٸن اۆسترالييالىق MJA Entertainment پروموۋتەرلٸك كومپانيياسىمەن كەلٸسٸمشارت جاساسىپ, كەسٸپقوي بوكسقا اۋىسقان بولاتىن. الايدا, ولار ۋەدەسٸنەن تايىپ, كەيٸن كەلٸسٸمنەن باس تارتقانى تۋرالى حابارلاعانبىز.
