فوتو: wikipedia.org
تيبەت بۋدديزمٸندەگٸ ەڭ باستى تۇلعا دالاي لامانىڭ ناقىل سٶزدەرٸ كٶپشٸلٸكتٸ ويلاندىرىپ, كەيدە ادامدار ٸشٸندەگٸ سۇراقتارعا جاۋاپ تاۋىپ جاتادى.
سولاردىڭ بٸرنەشەۋٸ ۇسىنىلىپ وتىر:
ادام بالاسىنىڭ ٶمٸرٸندە اسا ماڭىزدى ەكٸ قۇندىلىق بار. وسى ەكەۋٸنەن ٶزگەسٸن كەلەسٸ ورىندارعا قويۋعا بولادى. بارلىق ادام دٸني سەنٸم-نانىمدارىنىڭ قانداي ەكەندٸگٸنە قاراماستان مەيٸرٸمدٸ ھەم كەشٸرٸمشٸل بولعانى ابزال. سوندا ٷنەمٸ كٶڭٸلٸمٸز جايدارلانىپ, ەردايىم جادىراپ-جايناپ جٷرمەكپٸز. قامشىنىڭ سابىنداي قىسقا وسىناۋ الاساپىران دٷنيەدە بٸزگە وسىدان ارتىق تاڭداۋ دا جوق.
ادام بالاسى اقشا تابۋ ٷشٸن, دەنساۋلىعىن قۇرباندىققا شالىپ جٸبەرەدٸ. سوسىن, تاپقان اقشاسىن, سول دەنەنٸ ساۋىقتىرۋ ٷشٸن جۇمسايدى. بولاشاققا ەردايىم اسىعادى دا, بٷگٸننٸن ۇمىتادى. اقىرعى نەتيجەدە ادام بٷگٸنگە دە, ەرتەنگٸ ۋاقىتقا دا عۇمىرى جەتپەي قالادى. نەگە دەسەڭٸز, ەر پەندە ەشقاشان ٶلمەيتٸندەي ٶمٸر سٷرەدٸ دە, كٷندەردٸڭ بٸر كٷنٸندە ەشقاشان ٶمٸر سٷرمەگەندەي- اق ٶمٸردەن ٶتەدٸ.
ادام بالاسىندا سەنٸم مەن ٷمٸتتٸڭ مىڭداعان شوعى مازداپ تۇرادى. بٸرٸ سٶنسە دە, ٶزگەسٸ قالادى. بٸرەر سەتسٸزدٸككە ۇرىنعان سوڭ سەنٸمٸن جوعالتاتىندار بولادى. الايدا, ٶمٸر دەگەن ٶلشەۋسٸز باي, ادامنىڭ اقىل-ويى تۇڭعيىق تەرەڭ. بٸر عانا ٷمٸتكە بارلىعىن ارتۋ –كٶرسوقىرلىق. ەگەر سول جالعىز ٷمٸت اقتالماسا, ٶمٸر قۇردىمعا كەتپەي مە? سوندىقتان, ونداي قاتەرگە ٶزٸمٸزدٸ يتەرمەيٸك.
ەر تاڭدا ويانعان سايىن كٷننٸڭ كٶزٸن كٶرگەنٸڭە قۋان. سەن ەسەن ساۋسىڭ, اسىل جانسىڭ. ازات تا اسىل جاننىڭ كٶرەر قىزىعى الدا.وسى مٷمكٸندٸكتٸ بوسقا جٸبەرمەگٸن. ەلەمگە نۇرلى شۋاق شاشۋ ٷشٸن ٶزٸڭدٸ دامىت, جٷرەگٸڭدٸ تازارت. دەل بٷگٸننەن وسىلاي, ٶزگەلەرگە شىن نيەتپەن قاتىناس جاساعىن. ادام وي مەن جامان نيەتتەن اۋلاق بولىپ, ٶزٸڭدٸ سەرگەك ۇستا.
جاڭا عاسىر بٸزدەن تىڭ يدەيالاردى تالاپ ەتٸپ جاتىر. سوندىقتان, بۇرىڭعىدان دا كەڭ ٶرٸس, كٶپشٸل كٶزقاراس, ادامزاتقا اسا قاجەت بولىپ وتىر. تەك ٶزٸڭنٸڭ قامىڭدى كٷيتتەيتٸن زامان كەلمەسكە كەتتٸ. «مەنٸڭ عانا وتباسىم, اتا -تەگٸم, رۋىم عانا»- دەپ تار شەڭبەردە شەكتەلمەي كٷللٸ ەلدٸڭ, ەل-جۇرتىنىڭ جوعىن جوقتاپ, مۇڭىن مۇڭدايتىن جاۋاپكەرشٸلٸك بٸزگە جٷكتەلدٸ.
بەيسەنعازى ۇلىقبەك
قازاقستان جۋرناليستەر وداعىنىڭ مٷشەسٸ
