ٶتكەن تەۋلٸكتە قازاقستاندا كوروناۆيرۋس جۇقتىرعانى زەرتحانادا دەلەلدەنگەن 7 117 ناۋقاس تٸركەلدٸ. ەڭ كٶپ كٶرسەتكٸش الماتى قالاسىندا, مۇندا 1 625 ناۋقاس ەسەپكە الىندى. ەكٸنشٸ ورىندا – استانا, شاھاردا بٸر تەۋلٸكتە دەرت جۇقتىرعان 951 ادام تٸركەلدٸ. بۇل جٶنٸندە قازاقستاننىڭ دەنساۋلىق ساقتاۋ مينيسترلٸگٸ حابارلادى.
رەسمي دەرەك بويىنشا, ەلدە كوروناۆيرۋسى زەرتحانادا دەلەلدەنگەن ناۋقاستاردىڭ جالپى سانى 730 مىڭنان استى.
بەيسەنبٸدە ٸندەت سالدارىنان 103 ادام, ال پتر نەتيجەسٸ تەرٸس بولسا دا, كلينيكالىق بەلگٸلەرٸ Covid-كە ۇقساس "كوۆيدتەكتەس پنەۆمونييادان" 26 ادام كٶز جۇمدى.
پاندەمييا باستالعالى قازاقستاندا بۇل دەرتتەن 8 209 ادام, ال "كوۆيدتەكتەس پنەۆمونييادان" 4 200 ادام كٶز جۇمعان. بٸراق كەي ساراپشىلاردىڭ ايتۋىنشا, ٸندەت قۇرباندارىنىڭ سانى رەسمي دەرەكتەن اناعۇرلىم كٶپ بولۋى مٷمكٸن.
سوڭعى اپتالاردا قازاقستاندا كوروناۆيرۋس جۇقتىرعاندار ستاتيستيكاسى تەۋلٸگٸنە 7 مىڭ ادامنان تٷسپەي تۇر. دەنساۋلىق ساقتاۋ سالاسى باسشىلارىنىڭ ايتۋىنشا, بۇعان كوروناۆيرۋستىڭ جىلدام جۇعاتىن "دەلتا" ۆاريانتىنىڭ تارالۋى, جۇرتتىڭ قاۋٸپسٸزدٸك ەرەجەلەرٸن, ماسكا رەجيمٸن ساقتاماۋى سەبەپ بولدى.
دەنساۋلىق ساقتاۋ مينيسترلٸگٸنٸڭ دەرەگٸ بويىنشا, قازٸر 123 مىڭداي ادام كوروناۆيرۋستان ەمدەلٸپ جاتىر, ونىڭ 30 مىڭدايى – ستاتسيوناردا. 1 920 ادامنىڭ جاعدايى اۋىر, 549 پاتسيەنتتٸڭ احۋالى ٶتە اۋىر, ال 224 ناۋقاس ٶكپە جەلدەتكٸش اپپاراتقا قوسىلعان.
قازاقستاندا كوروناۆيرۋسقا قارسى ەكپە العاندار سانى 6,3 ملن ادامنان استى, سونىڭ ٸشٸندە 4,9 ملن ادام ۆاكتسينانىڭ ەكٸ دوزاسىن تولىق العان. ەلدە قازٸر نەگٸزٸنەن رەسەيدە ەزٸرلەنٸپ, قاراعاندى زاۋىتىندا شىعارىلعان "سپۋتنيك V" ۆاكتسيناسى جەنە قازاقستاندىق QazVac قولدانىلادى.
امەريكالىق دجونس حوپكينس ۋنيۆەرسيتەتٸ مەلٸمەتٸ بويىنشا, ەلەمدە Covid جۇقتىرعانداردىڭ رەسمي سانى 210 ميلليوننان استى, 4,4 ملن ادام كٶز جۇمدى.
