Ótken táýlikte Qazaqstanda koronavirýs juqtyrǵany zerthanada dáleldengen 7 117 naýqas tirkeldi. Eń kóp kórsetkish Almaty qalasynda, munda 1 625 naýqas esepke alyndy. Ekinshi orynda – astana, shaharda bir táýlikte dert juqtyrǵan 951 adam tirkeldi. Bul jóninde Qazaqstannyń densaýlyq saqtaý ministrligi habarlady.
Resmi derek boiynsha, elde koronavirýsy zerthanada dáleldengen naýqastardyń jalpy sany 730 myńnan asty.
Beisenbide indet saldarynan 103 adam, al PTR nátijesi teris bolsa da, klinikalyq belgileri Covid-ke uqsas "kovidtektes pnevmoniiadan" 26 adam kóz jumdy.
Pandemiia bastalǵaly Qazaqstanda bul dertten 8 209 adam, al "kovidtektes pnevmoniiadan" 4 200 adam kóz jumǵan. Biraq kei sarapshylardyń aitýynsha, indet qurbandarynyń sany resmi derekten anaǵurlym kóp bolýy múmkin.
Sońǵy aptalarda Qazaqstanda koronavirýs juqtyrǵandar statistikasy táýligine 7 myń adamnan túspei tur. Densaýlyq saqtaý salasy basshylarynyń aitýynsha, buǵan koronavirýstyń jyldam juǵatyn "delta" variantynyń taralýy, jurttyń qaýipsizdik erejelerin, maska rejimin saqtamaýy sebep boldy.
Densaýlyq saqtaý ministrliginiń deregi boiynsha, qazir 123 myńdai adam koronavirýstan emdelip jatyr, onyń 30 myńdaiy – statsionarda. 1 920 adamnyń jaǵdaiy aýyr, 549 patsienttiń ahýaly óte aýyr, al 224 naýqas ókpe jeldetkish apparatqa qosylǵan.
Qazaqstanda koronavirýsqa qarsy ekpe alǵandar sany 6,3 mln adamnan asty, sonyń ishinde 4,9 mln adam vaktsinanyń eki dozasyn tolyq alǵan. Elde qazir negizinen Reseide ázirlenip, Qaraǵandy zaýytynda shyǵarylǵan "Spýtnik V" vaktsinasy jáne qazaqstandyq QazVac qoldanylady.
Amerikalyq Djons Hopkins ýniversiteti málimeti boiynsha, álemde Covid juqtyrǵandardyń resmi sany 210 millionnan asty, 4,4 mln adam kóz jumdy.
