فوتو: ۇيىمداستىرۋشىلاردان
استانا قالاسىندا ٶتكەن Astana International Forum اياسىندا Corporate Chess Cup 2025 شاحمات تۋرنيرٸ ٶتتٸ. بۇل تۋرنيردٸڭ جەڭٸمپازى ەرٸ كورپوراتسييالار اراسىنداعى شاحماتتان II ەلەم چەمپيوناتىنا جولداما يەگەرٸ ERG (Eurasian Resources Group) كومانداسى بولدى, دەپ حابارلايدى Ult.kz.
ەرتٷرلٸ مەلٸمەتتەرگە سەيكەس, بٷگٸندە ەلەمدە 700 مىڭنان استام بەلسەندٸ شاحمات ەۋەسقويى بار. ال حالىقارالىق شاحمات فەدەراتسيياسى (فيدە) شاحماتتى تۇراقتى تٷردە وينايتىن ادام سانىن 1 ميلليارقا جەتكٸزۋدٸ ٶز ماقساتتارىنىڭ بٸرٸ رەتٸندە اتاپ ٶتەدٸ. الايدا بۇقارالىق سيپات كٶبٸنەسە شاحمات فەدەراتسييالارى, كلۋبتارى مەن تۋرنيرلەرٸنە دەمەۋشٸلەر تاراپىنان كٶرسەتٸلەتٸن قارجىلاي قولداۋعا تەۋەلدٸ. وسى سەبەپتٸ 2024 جىلدىڭ 14-17 ماۋسىم ارالىعىندا نيۋ-يورك قالاسىندا (اقش) ٶتكەن كورپوراتسييالار اراسىنداعى شاحماتتان I ەلەم چەمپيوناتىنىڭ (FIDE World Corporate Chess Championship) فينالدىق تۋرنيرٸ ٷلكەن قىزىعۋشىلىق تۋدىردى.
2025 جىلى بۇل تۋرنير ەكٸنشٸ رەت ٶتەدٸ. وندا باسقا دا كوماندالارمەن قاتار قازاقستاننان ٸرٸكتەۋ كەزەڭٸنەن ٶتكەن كوماندا دا قاتىسادى. ٸرٸكتەۋ تۋرنيرٸ رەتٸندە Corporate Chess Cup 2025 سايىسى ٶتتٸ. بۇل جارىستى Astana International Forum (AIF2025) حالىقارالىق فورۋمى اياسىندا KazChess/قازاقستان شاحمات فەدەراتسيياسى (قشف) Freedom Holding Corp. جەنە «استانا» حالىقارالىق قارجى ورتالىعىنىڭ (AIFC) قولداۋىمەن ۇيىمداستىردى.
فوتو: ۇيىمداستىرۋشىلاردان
جارىس 29 مامىردا ساعات 14:30-دا AIFC ساۋدا زالىندا باستالدى. شارانىڭ جوعارى مەرتەبەسٸن KazChess/قشف ۆيتسە-پرەزيدەنتتەرٸنٸڭ قاتىسۋى ايقىندادى. قۇرمەتتٸ قوناقتار قاتارىندا فيدە پرەزيدەنتٸنٸڭ كەڭەسشٸسٸ بەرٸك بالعاباەۆ, تٷرٸكمەنستان شاحمات فەدەراتسيياسىنىڭ تٶراعاسى ۆەپا مياليكگۋلىەۆ جەنە PythonAnywhere بۇلتتى پلاتفورماسىنىڭ سەرٸكتەسٸ, @GRADIA-نىڭ نەگٸزٸن قالاۋشى جەنە اتقارۋشى ديرەكتورى كونراد حو بولدى.
تۋرنيردٸڭ جٷلدە قورى دا نازار اۋدارۋعا تۇرارلىق: جەڭٸمپاز كومانداعا كورپوراتسييالار اراسىندا ٶتەتٸن ەلەم چەمپيوناتى-2025 تۋرنيرٸنە (FIDE World Corporate Chess Championship 2025) قاتىسۋ قۇقىعىمەن بٸرگە 1 ملن تەڭگە بەرٸلدٸ. 2-ورىن العان كوماندا – ₸650 000, ال 3-ورىن يەگەرٸ – ₸350 000 يەلەندٸ. كوماندا ويىنشىلارى مەدالدارمەن جەنە ديپلومدارمەن ماراپاتتالدى.
باس تٶرەشٸ اسىلحان كاراەۆ جارىستىڭ رەگلامەنتٸن قىسقاشا تانىستىرىپ ٶتتٸ. قر مەملەكەتتٸك گيمنٸ مەن فيدە گيمنٸ ورىندالدى. نەگٸزگٸ 4 ويىنشى جەنە قاجەت بولعان جاعدايدا 1 قوسالقى ويىنشىدان قۇرالعان, 2000-نان اسپايتىن ەلو رەيتينگپەن (كلاسسيكا, راپيد, بليتس) 20 كوماندا 10+2 ۋاقىت باقىلاۋىمەن (ەر پارتيياعا 10 مينۋت جەنە بٸرٸنشٸ جٷرٸستەن باستاپ ەر جٷرٸسكە 2 سەكۋند) شۆەيتسار جٷيەسٸ بويىنشا 7 تۋر وينادى.
فوتو: ۇيىمداستىرۋشىلاردان
العاشقى تۋرلاردان-اق كٶش باسىنا رەيتينگ بويىنشا ٷزدٸكتەر شىقتى: ERG (Eurasian Resources Group) (ورتاشا رەيتينگ – 1884), «قازمەديا ورتالىعى» (بك) جشس (1732), NCOC (North Caspian Operating Company) (1565) جەنە Freedom Holding Corp. (1483). 3-شٸ تۋردا, ەكٸ جەڭٸستەن كەيٸن وسى كوماندالار بٸر-بٸرٸمەن كەزدەستٸ: ERG – Freedom Holding Corp. جەنە NCOC مەن «قازمەديا ورتالىعى». بٸرٸنشٸ جۇپتا جەڭٸمپاز ايقىندالمادى – 2-2, ال ەكٸنشٸ جۇپتا 3-1 ەسەبٸمەن «مۇنايشىلار» جەڭدٸ. ولار 6 كوماندالىق ۇپايمەن (جەڭٸسكە – 2 ۇپاي, تەڭ ويىنعا – 1 ۇپاي, جەڭٸلٸسكە – 0 ۇپاي بەرٸلدٸ) تۋرنير كەستەسٸنٸڭ كٶشٸن جەكە-دارا باستادى.
4-شٸ تۋردا NCOC تاعى بٸر نەگٸزگٸ قارسىلاسىن – Freedom Holding Corp.-تى 3–1 ەسەبٸمەن ۇتتى. قورىتىندى جەڭٸسكە ٷمٸتكەر بولدى. الايدا 5-شٸ تۋردا ولار ERG كومانداسىنان 1–3 ەسەبٸمەن جەڭٸلٸپ, كٶشباسشىلىقتى «ەۆرازييالىقتارعا» بەردٸ.
جارىس سوڭىنا ەكٸ تۋر قالعاندا كٶشباسشىلار بىلايشا ورنالاستى: ERG – 9 كوماندالىق ۇپاي, NCOC پەن «قازمەديا ورتالىعى» – 8, Freedom Holding Corp. جەنە «Mycar Group» – 7. جەنە ERG قالعان ٷشتٸكپەن ويناپ قويعاندىقتان, مىناداي سۇراق تۋىندادى: «قازمەديا ورتالىعى» كٶشباسشى كوماندانى توقتاتا الا ما? توقتاتا المادى… ERG – «قازمەديا ورتالىعى» – 4–0. تاس-تالقان ەتتٸ! سوڭعى تۋردا «ەۋرازييالىقتارعا» Kazakhmys Group قارسى تۇردى, بٸراق بۇل سەنساتسييا جاساي الاتىن قارسىلاس ەمەس ەدٸ. ال 2½–1½ ەسەبٸمەن تٸركەلگەن قاراپايىم جەڭٸس ناقتى نٷكتە قويدى.
فوتو: ۇيىمداستىرۋشىلاردان
تۋرنيردٸڭ قورىتىندى نەتيجەلەرٸ:
- 1. ERG – 13 كوماندالىق ۇپاي, 22½ جەكە ۇپاي;
2. NCOC (North Caspian Operating Company) – 12, 21;
3. Freedom Holding Corp. – 10, 18.
بٸردەن التى (!) كوماندا 8 ۇپاي جينادى, سوندىقتان ولاردىڭ ٷشەۋٸ ٷشٸن تەك جەكە ۇپاي عانا ەمەس, بۋحگولتس كوەففيتسيەنتٸ دە ەسەپتەلدٸ:
- 4. Astana Hub – 8, 16½;
5. Allur – 8, 15;
6. «قازمەديا ورتالىعى بك» جشس – 8, 14½, 122;
7. پرەزيدەنت ٸس باسقارماسى قۇراماسى – 8, 14½, 108½;
8. قر ۇلتتىق بانكٸ – 8, 14½, 99;
9. ForteBank – 8, 14.
ال ەلەم چەمپيوناتىنا جولدامانى ERG (Eurasian Resources Group) كومانداسى جەڭٸپ الدى. بۇل كوماندادا تاقتا رەتٸ بويىنشا موتيۆاتسييا جٶنٸندەگٸ ساراپشى ەدٸل دوسوۆ, ديدار يرمانوۆ جابدىقتار مەن ماشينالاردى جٶندەۋ شەبەرٸ, اۋىسپالى اۋىسىمداعى ەلەكتر شەبەرٸ باۋبەك قوجانييازوۆ, ٶندٸرٸس پروتسەسٸندە شيكٸزاتتى, جارتىلاي فابريكاتتاردى جەنە دايىن ٶنٸمدٸ تاسىمالداۋ بويىنشا بريگادير (دەل سولاي!) مەيرامبەك اقبالين جەنە بيزنەس-تالداۋشى دۋمان وسپانوۆ ٶنەر كٶرسەتتٸ.
ايتا كەتەرلٸك جايت, «فوربس قازاقستان» سايتىندا 10 جىل بۇرىن شىققان, حرومتاۋدا گروسسمەيستەر, قازٸرگٸ ەيەلدەر قۇراماسىنىڭ باس باپكەرٸ پاۆەل كوتسۋر بەرگەن سەانس تۋرالى ماقالادا اقتٶبە فەرروقورىتپا زاۋىتىنىڭ بالقىتۋشىسى مەيرامبەك اقبالين مەن سول زاۋىتتىڭ ەلەكتر شەبەرٸ باۋبەك قوجانييازوۆتىڭ ەسٸمدەرٸ اتالادى.
ال Freedom Holding Corp. قۇرامىندا ەكٸ تۋردا ونىڭ نەگٸزگٸ اكتسيونەرٸ جەنە باس اتقارۋشى ديرەكتورى (CEO), سونداي-اق KazChess/قشف پرەزيدەنتٸ تيمۋر تۋرلوۆ وينادى.
