قازاقستاندا بىلتىر مەملەكەتتٸك بيۋدجەت كٸرٸستەرٸ بويىنشا جوسپار 102,4%, رەسپۋبليكالىق بيۋدجەت 100,1%, ال جەرگٸلٸكتٸ بيۋدجەت 108% ورىندالدى. قر قارجى مينيسترلٸگٸ مەملەكەتتٸك كٸرٸستەر كوميتەتٸنٸڭ تٶراعاسى مارات سۇلتانعازيەۆ ورتالىق كوممۋنيكاتسييالار الاڭىنداعى باسپاسٶز مەسليحاتى بارىسىندا وسىلاي دەدٸ, دەپ حابارلايدى قازاقپارات.
كوميتەت باسشىسىنىڭ ايتۋىنشا, 2019 جىلعا قاراعاندا ۆەدومستۆو قۇزىرەتٸندەگٸ مەملەكەتتٸك بيۋدجەتتٸڭ كٸرٸستەرٸ پاندەميياعا قاراماستان ٸس جٷزٸندە بۇرىنعى دەڭگەيدە قالعان. ال رەسپۋبليكالىق بيۋدجەت 608 ملرد تەڭگەگە تٶمەندەسە, جەرگٸلٸكتٸ بيۋدجەت 604 ملرد تەڭگەگە ٶسكەن.
«رەسپۋبليكالىق دەڭگەيدەگٸ تٷسٸمدەردٸڭ تٶمەندەۋٸ ەكونوميكاداعى قالىپتاسقان جاعدايعا, سونداي-اق پاندەميياعا قاتىستى شەكتەۋلەرگە بايلانىستى بولىپ وتىر», - دەدٸ مارات سۇلتانعازيەۆ.
كوميتەت تٶراعاسى الدىن الا دەرەكتەر بويىنشا جالپى ٸشكٸ ٶنٸم 2,6%, تاۋار اينالىمى 14% تٶمەندەگەنٸن دە قوستى. ٶتكٸزۋ بويىنشا اينالىم 9,7%, ونىڭ ٸشٸندە ٸرٸ كەسٸپورىندار بويىنشا 25% ازايعان.
